Lo parlament chinés a aprovat la polemica lei de seguretat nacionala a Hong Kong. Lo tèxt implica que China pren lo poder total de l’ex-colònia britanica perque anulla, de fach, los acòrdis entre lo Reialme Unit e China que l’obligavan a respectar la libertat d’Hong Kong.
 
Lo parlament de Pequin a votat a l’unanimitat un tèxt que cèrca de combatre “lo separatisme, lo terrorisme, la subversion e la collusion amb de fòrças extèrnas e estrangièras” a Hong Kong. A mai, o an fach qualques oras abans del primièr de julhet, jorn que se fa tradicionalament una granda manifestacion per commemorar la cession d’Hong Kong a China e per revendicar los dreches de la vila, contenguts dins lo tractat internacional qu’o rendiá possible. De seguir çò que se passarà uèi en aquela ciutat.
 
Lo tèxt de la nòva lei l’an redigit long de sièis setmanas mas lo contengut es vengut public après son aprobacion. Es mai que mai grèu que lo Conselh Legislatiu, lo parlament d’Hong Kong, l’aja pas quitament pogut legir. Per tant, l’aprobacion d’aquela lei viòla la Constitucion d’Hong Kong, qu’establís que Pequin pòt pas impausar de nòrmas coma aquela sens l’autorizacion del parlament hongkongués.
 
Segon la premsa chinesa, la lei establirà un nòu “organ de seguretat nacionala” a Hong Kong, un nòu còrs de polícia, contrarotlat dirèctament per Pequin e amb la facultat de metre en examen de cases especials e de collectar d’informacion. Donarà tanben al cap de govèrn d’Hong Kong, jos la supervision del govèrn chinés, lo poder de nomenar de jutges pels afars de la seguretat nacionala, çò que viòla l’autonomia del poder judiciari de la vila.
 
 
Los partits democratics passan a la clandestinitat
 
Tanlèu aprene l’aprobacion de la lei, lo dirigent pròdemocracia Joshua Wong a anonciat qu’abandonava Demosisto, lo partit politic qu’el aviá fondat, e a declarat sus Twitter qu’aviá paur d’èsser la buta màger de la nòva lei. D’autres membres fondadors del partit, coma Nathan Law, Agnes Chow e Jeffrey Ngo, an anonciat que tanben abandonavan lo partit, dins un gèst que significa lo passatge a la clandestinitat, perque Demosisto serà solament actiu formalament en exili. Tanben lo Partit Nacional per l’Independéncia d’Hong Kong a anonciat que quitariá d’obrar dins la vila e que trabalhariá en Taiwan, país qu’a anonciat que intensificariá lo supòrt als democratas hongkongueses.
 
Aquela lei agravarà las tensions entre China e los Estats Units, los païses del G7 e l’Union Europèa. Diluns, los Estats Units, a causa de la possibilitat imminenta que s’aprovèsse la lei, traguèron l’estatut privilegiat a Hong Kong, que poirà pas pus aquerir de material sensible que China pòt pas crompar. Lo secretari d’estat estatsunidenc o justificava en disent qu’Hong Kong aviá quitat d’èsser una entitat autonòma.
 
 

I hereby declare withdrawing from Demosisto...

If my voice will not be heard soon, I hope that the international community will continue to speak up for Hong Kong and step up concrete efforts to defend our last bit of freedom. pic.twitter.com/BIGD5tgriF

— Joshua Wong 黃之鋒  (@joshuawongcf) June 30, 2020