Lo rei Felip de Belgica a demandat perdon, pel primièr còp de manièra oficiala, pels “actes de violéncia” comeses en Còngo pendent l’epòca coloniala. A l’ocasion del 60n anniversari de l’independéncia de país african, lo rei bèlga a mandat una letra al president de la Republica Democratica de Còngo, Félix Tshisekedi, ont exprimís sa dolor pel mal que los ancians colonizaires causèron. “A l’epòca de l’estat independent de Còngo d’actes de violéncia e de cruseltat foguèron comeses, que pesan encara sus nòstra memòria collectiva. Lo periòde colonial que seguiguèt tanben causèt de sofrenças e d’umiliacions”, çò ditz la letra ont lo monarca exprimís sos “mai prigonds planhs per aquelas nafraduras del passat que sa dolor es uèi reviscolada per las discriminacions encara tròp presentas dins  nòstras societats”. Dins aquel sens, lo monarca s’engatja a “combatre totas las formas de racisme” e encoratja la comission que la crearà lo parlament bèlga per enquistar lo passat colonial per fin de “pacificar definitivament” lor “memòria”.
 
Lo gèst del monarca arriba a un moment que Belgica viu de protèstas contra los simbòls colonials en seguida de las protèstas antiracistas als Estats Units.