L’èx-president de la Polinesia Francesa, Gaston Flosse, qu’a ochanta nòu ans, s’es declarat “sobeiranista” e a demandat un referendum per decidir l’avenir del territòri a respècte de l’estat francés.
 
Flosse foguèt lo primièr president de la Polinesia Francesa autonòma, en 1984, e pendent tota sa vida politica foguèt contrari a l’independéncia, que la defendiá son principal opausant, Oscar Temaru. Ça que la, ara Flosse afirma que l’autonomia es arribada a sos limits e prepausa que Polinesia venga un “estat sobeiran associat a França”. Son idèa es quicòm de semblable a l’estatut de las illas Cook, que son un estat independent mas restacat a la Nòva Zelanda que s’encarga de la defensa del territòri.
 
Gaston Flosse ocupèt fòrça cargas pendent quatre decennis, foguèt cònsol màger de Pirae, deputat, senator, president de la Polinesia Francesa. Foguèt quitament ministre encargat dels problèmas del Pacific Sud (1986-1988) pendent lo segond govèrn de Jacques Chirac, amb lo qual fondèt lo partit Recampament per la Republica (RPR).
 
Totun, las relacions amb l’estat francés pejorèron quand Nicolas Sarkozy ne foguèt president (2007-2012). Alavetz i aguèt de proceduras judiciàrias contra Flosse per d’emplecs fictius e en 2014 la justícia lo declarèt inelegible.
 
Gaston Flosse demanda ara un referendum. “L’independéncia, fa 43 ans que se n’ausís a parlar, aquò a pas avançat d’un centimètre: sèm decidits, avèm la fe e la volontat de desbocar e desbocarem”, çò a dich sus la cadena locala TNTV en anonciant un cambiament de nom e de linha politica per son partit.