La Comission Europèa a acusat l’Estat francés de mancar la proteccion de divèrsas espècias d’animals, mai que mai per rapòrt al nuclèu d’orses que i a dins los Pirenèus occidentals, ont l’espècia es en perilh d’extincion, e cap d’esfòrç s’es pas fach.

L’Estat francés recebèt en decembre passat una letra de somacion, e dins los meses avenidors, lo govèrn de la Republica es obligat de far quicòm se vòl pas que l’afar passe als tribunals.
 
La denóncia ven de divèrsas associacions dels estats espanhòl e francés qu’avián condemnat la passivitat dels govèrns e l’incompliment dels engatjaments per rapòrt al plan de restauracion e conservacion dels orses de 2006 a 2009.
 
Segon las organizacions ecologistas, l’adaptacion e reproduccion dels cinc exemplars d’orses, introdusits dins los Pirenèus centrals en aquela epòca, se pòrta pro plan en Coseran, Comenge, Val d’Aran e Bigòrra. Per contra, en Bearn, s’es pas res fach per n’evitar la pèrda definitiva e, a l’ora d’ara, sonque i a dos mascles: Neré e Canelito.
 
En julhet de 2010, lo ministre de l’Ecologia avertiguèt de las possiblas consequéncias: “se respectam pas las nòstras obligacions europèas, es pas solament una multa que l’Estat aurà de pagar. Se veiràn menaçats totes los fonzes europèus destinats als Pirenèus”, çò diguèt.
 
La reïntroduccion de l’ors dins los Pirenèus es tostemps estat un tèma polemic. Las populacions localas planhon sovent d’èsser pas estadas consultadas.