Actualitats
Lemosin: quina es la situacion de l’ensenhament de l’occitan a l’ora d’ara?
Lo mond s’interrògan sus la volontat del rectorat de Lemòtges, malgrat l’actitud volontària de l’ancian rector que ratifiquèt la convencion per l’ensenhament de l’occitan
L’acadèmia de Lemòtges —una de las onze subdivisions escolaras que pertòcan Occitània dins l’estat francés— ratifiquèt al començament de 2018 la convencion pel desvolopament e l’estructuracion de l’ensenhament de l’occitan. La convencion l’aviá escricha un an abans l’Ofici Public de la Lenga Occitana (ÒPLO) e la signèt la ministra de l’educacion d’alavetz, Najat Vallaud-Belkacem. Ara, se crenh que lo nòu rector aja pas la meteissa volontat. La redaccion de Jornalet a accedit al rapòrt del conselh academic de l’acadèmia de Limòtges.
La situacion de l’occitan dins l’educacion en Lemosin es fòrça febla. Malgrat qu’en 2017 l’Ofici Public de la Lenga Occitana (ÒPLO), las regions e lo ministèri de l’educacion signèsson una convencion per assegurar los mejans financièrs e umans per l’educacion en occitan, lo darrièr rapòrt del conselh academic de l’acadèmia de Lemòtges mòstra que i a pas agut cap d’avançament.
La convencion de 2017 la ratifiquèt al començament de febrièr de 2018 l’acadèmia de Lemòtges. La de Tolosa o a pas fach. Aquela convencion prevesiá per cada sit un percors del.primari al licèu. Mas ara per ara tot çò que i a es un sit a Lemòtges qu’existissiá ja dins lo sector privat a l’Institucion Beaupeyrat e un sit a Briva que l’opcion d’occitan i dobriguèt dins un collègi a la rintrada de 2019.
A Selhac, i a un ensenhament al collègi dempuèi longtemps que se contunha après la retirada de l’anciana professora Dominique Decomps. E a Briva se dobriguèt un ensenhament al collègi Arsonval. A mai, i a tanben un ensenhament al collègi Clemenceau de Tula.
En mai d’aquò, a Tula, la còla del festenal Balad’òc arribèt de dobrir l’opcion d’occitan al licèu Edmond Perrier gràcias a l’atencion de l’ancian provisor. Mentretant, la còla del festenal Tula es en contacte amb la còla de la calandreta de Lemòtges per fondar una escòla associativa en occitan a Tula.
Al primari, i a pas res. Malastrosament, lo conselh pedagogic previst es reportat al mes de setembre. Mentretant, los ensenhaires e los occitanistas del país se veson forçats d'esperar de se mobilizar en rason d’un conselh academic.
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cal defensar las terras e la lenga dels trobadors davant l'intolerancia e la barbaria dels governs fascinerosos petenistas.
Bona iniciativa de la part deu "jornalet".E seré possible d'aver la situacion de las autas academias d'Occitania ? Mercès.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari