Aquí de trabalh pels entraïnaires e los preparators fisics amb aquela sason preparada, entamenada, arrestada, repreparada, represa. En Austràlia, cada dimenjada pòrta son nombre de jogaires nafrats e d’incidents musculars: ligaments, adductors, isquiocrurals tocats. D’esperar que se ne tirarà de leiçons en Superliga per esvitar aquelas nafraduras e que se sauprà faire virar los efectius.
 

Superliga: los Dragons reprenon l’entraïnament
 
Es aqueste diluns 6 de julh que los catalans reprenon lo camin de Brutus per d’entraïnaments collectius en vista de preparar la represa del 2 d’agost. Lo president Guasch espèra de poder organizar una partida bèla a Perpinhan lo dissabte 8 d’agost per 5 000 espectators.
 
Es amb plaser que los catalans an vist James Maloney e Israel Folau afirmar que serián plan en sang e aur la sason venenta e que respondrián pas brica a de demandas vengudas d’NRL o del XV.
 
Se descobrirà lo calendièr de la sason dins la setmana, coma lo sòrt reservat a las formacions del Championship.
 
 
NRL: 4 ensages per Sivo, l’alièr de las Anguialas
 
L’alièr fijian de Parramatta, Maika Sivo, marca 4 ensages que traduson la superioritat de sa formacion, cap de fila de l’NRL, suls Vaquièrs: 42-4.
 
Fin de partida interdita als cardiacs entre la Tempèsta de Melbourne e los Polets: Sydney mena 22-12, mas Melbourne pren l’avantatge amb 2 ensages transformats: 24-22. Los Polets pensan de ganhar aprèp una penalitat per egalizar e un tombat, mas dins las darrièras segondas l’arrièr Papenhuyzen signa un tombat que mena al punt en aur que se clavarà per una penalitat en favor de la Tempèsta (27-25).
 
Las Làmias son sens pietat pels Titans: 40-10; Brisbane i es pas mai: desfaita fàcia als neozelandeses (26-16). Newcastle ten còp a Manly per ganhar 14-12.
 
 
Un entraïnaire occitan per Ottawa
 
Laurenç Fraissinós que foguèt d’ans l’entraïnaire dels Dragons Catalans travèrsa l’Atlantic per prene en carga l’esquipa d’Ottawa que jogarà l’an que ven dins lo campionat anglés de League One (tresen nivèl) amb l’espèr de montar en Championship e, qui sap, de rejónher Toronto en Superliga. Laurenç Fraissinós a dit que voliá formar de jogaires canadians, mas tanben faire apèl a de jogaires d’Occitània e de Catalonha temptats per aquela aventura.
 



Alan Roch