Per normalizar lors relacions, Serbia e Kosova reprendràn las convèrsas lo 12 de julhet que ven jol parapluèja de l’Union Europèa. Belgrad e Prishtina tornaràn aital activar lo dialòg promogut per l’UE que se paralisèt en novembre de 2018. Lo president sèrbe, Aleksandar Vučić, e lo primièr ministre kosovar, Avdullah Hoti, s’amassaràn dimenge a Brussèlas dins una reünion moderada pel Naut Representanta de l’UE, Josep Borrell. Abans, los dos dirigents auràn parlat divendres per videoconferència amb la cancelièra Angela Merkel e lo president francés Emmanuel Macron.
 
La reactivacion del dialòg promogut per Brussèlas arriba pauc après lo rescontre falhit a l’Ostal Blanc entre lo president sèrbe e lo president de Kosova, Hashim Thaçi, acusat de crimes de guèrra pel procuraire de la Cort Internacionala de Justícia de l’Aia. De fach, la reünion s’anullèt en seguida de l’anóncia d’aquela acusacion.
 
Los Estats Units e l’Union Europèa trabalhan sus dos procèsses de dialòg separats per normalizar las relacions entre Serbia e Kosova en seguida de l’independéncia dels kosovars en 2008.