Dos dels eveniments importants de las setmanas avenidoiras seràn cancelats a causa de la pandemia de la Covid-19: la Corsa d’Aran per sa Lenga (Aran) e la Pojada al Pòrt de Salau (Coserans).

Aran per sa Lengua
 
Pel primièr còp dempuèi 27 ans, la corsa per la lenga d’Aran es anullada. Dins aquel eveniment, la Val d’Aran se mobiliza a cada darrièr dimenge de julhet per una corsa que jonh sus la plaça de Vielha los participants que venon dels tres extrèms del país de cap de Garona. Aquí se tenon las revendicacions per l’usatge social de l’aranés, s’autreja lo prèmi Lengua Viua e un concèrt de Nadau met lo ponch final a l’eveniment.
 
 
Un eveniment virtual
 
La corsa l’organiza lo collectiu Lengua Viua qu’ongan es a amassar de proposicions e idèas per organizar d’activitats “que complisquen es mesures de seguretat e que poguen compartir-se a trauès des hilats sociaus”. Es atal que lo collectiu assegura que de qualque biais se farà ongan “ua Corsa desparièra, mès en tot mantier era defensa per usatge sociau dera nòsta lengua”.
 
Per n’èsser al fil podetz seguir la pagina Facebook del collectiu Lengua Viua.
 
 
Pojada a Salau
 
Una setmana pus tard, tostemps la primièra d’agost, se debana normalament dempuèi 33 ans la pojada al Pòrt de Salau, fòrça près d’Aran, sus un pòrt de montanha que jonh lo país catalan de Palhars e lo país occitan de Coserans. Ongan, totun, l’eveniment es anullat pr’amor de las circonstàncias sanitàrias.
 
Aquela “jornada de frairesa, de rescontre e de revendicacion de doas nacions amb un ligam istoric e cultural” l’an cancelada en tot esperar que “l’an que ven, la pandemia que vivèm serà un sovenir e que nos poirem retrobar en aqueste luòc”.
 
Mentretant, l’organizacion de l’eveniment, que son lo CAÒC del costat catalan e l’ASPIC del costat occitan, nos demandan”d’aver per la dimenjada dels 1r e 2 d’agost una pensada per aqueles que poiràn pas tornar pojar” e nos convidan a l’eveniment de 2021 que son segurs “que serà una granda fèsta”.