La carta d’identitat dels ciutadans dels Païses Basses mençonarà pas pus lo genre de la persona. Aquela precision es jutjada superflua e desapareisserà per ajudar tot aquel mond “que se senton pas d’un biais indubitable ni òme ni femna”, çò a dich la ministra de l’educacion e de la cultura Ingrid van Engelshoven. La mesura intrarà en vigor a partir de 2024, amb la presentacion d’un nòu modèl de carta d’identitat.
 
A mai, s’es anonciat una tièra de mesuras coma una guida per determinar se cal sollicitar l’informacion sul genre d’una persona e cossí se deu far. La guida explicarà quora es vertadièrament de besonh de registrar lo genre d’una persona. Per exemple, lo passapòrt deu mençonar aquela informacion perque es una nòrma europèa.
 
Totjorn que mai, lo sistèma binari òme/femna es mes en question pr’amor de la possibla ambigüitat dels organs sexuals, çò qu’es conegut coma queer-genre. La recèrca de l’identitat pròpria de cadun uèi lo jorn a per consequéncia que i a de mond que se definisson coma òmes, coma femnas, d’un genre intermediari, o ben sens genre o amb un genre especial qu’a pas cap de caracteristica dels autres dos genres.
 
Aquel genre “non binari” es reconegut en Canadà dempuèi agost de 2017. Aquel país a ajustat a las mençons tradicionalas “M” e “F”, que definissián respectivament lo sèxe masculin e femenin, una tresena mençon “X”, per las personas que s’identifican pas a cap dels dos genres. L’estat francés refusèt en blòc aquela reconeissença al mes de mai d’aquel an.