Facebook, Google e Twitter an decidit de collaborar pas pus amb la polícia d’Hong Kong e li transmetràn pas pus las donadas dels usatgièrs. Las tres grandas societats d’Internet an decidit de suspendre las demandas de la polícia d’aquela vila mentre qu’analisan se la nòva lei chinesa de seguretat nacionala pòrta prejudici als dreches umans. Amb aquesta nòva lei lo gigant asiatic s’es totalament apoderat de l’ex-colònia britanica e a ja arrestat e menat en justícia de mond que protestavan.
 
Coma se passa dins fòrça autres païses, la polícia d’Hong Kong podiá demandar las donadas de lors usatgièrs a las societats d’Internet per que l’ajudèsson dins sas enquistas. Mas ara las tres societats an mes fin a lor collaboracion. Facebook a fach una crida a “la libertat d’expression” coma “drech fondamental de las personas a s’exprimir sens paur” del temps que Google a declarat que son “fòrça inquiets sus las intencions de la lei de seguretat nacionala”.
 
Cal dire que Facebook, Google e Twitter òbran a Hong Kong, a la diferéncia de la China continentala, ont Internet es fòrtament censurat.
 
La polemica lei de seguretat nacionala permet a China de contrarotlar totalament l’ex-colònia britanica perque anulla, de fach, los acòrdis entre lo Reialme Unit e China que l’obligavan a respectar la libertat d’Hong Kong. La lei, que la votèt a l’unanimitat lo parlament de Pequin, intrèt en vigor lo 1r de julhet e cèrca de combatre “lo separatisme, lo terrorisme, la subversion e la collusion amb de fòrças extèrnas e estrangièras” a Hong Kong.
 
 
Los partits democratics an passat a la clandestinitat


Tanlèu saber l’aprobacion de la lei, lo dirigent pròdemocracia Joshua Wong anoncièt qu’abandonava Demosisto, lo partit politic qu’el aviá fondat, e declarèt sus Twitter qu’aviá paur d’èsser la buta màger de la nòva lei. D’autres membres fondadors del partit, coma Nathan Law, Agnes Chow e Jeffrey Ngo, an anonciat que tanben abandonavan lo partit, dins un gèst que significa lo passatge a la clandestinitat, perque Demosisto serà solament actiu formalament en exili. Tanben lo Partit Nacional per l’Independéncia d’Hong Kong a anonciat que quitariá d’obrar dins la vila e que trabalhariá en Taiwan, país qu’a anonciat qu’intensificariá lo supòrt als democratas hongkongueses.
 
Aquela lei agrava las tensions entre China e los Estats Units, los païses del G7 e l’Union Europèa. Los Estats Units an trach l’estatut privilegiat a Hong Kong, que pòt pas pus aquerir de material sensible que China pòt pas crompar. Lo secretari d’estat estatsunidenc o justificava en disent qu’Hong Kong aviá quitat d’èsser una entitat autonòma.