Fa doas setmanas, Dídac Cerezo, lo collaborador de Jornalet qu’escriu en auvernhat, se n’anèt cap a l’estat del Mato Grosso do Sul, en Brasil, en acompanhant una comission d’observaires internacionals, per fin d’ajudar la comunautat indigèna guaraní kaiowá a recuperar las siás tèrras. Un vidèo sul ret ajudèt a difusar lo conflicte (lo vidèo es tanben sostitolat en occitan).

“Tròp de patiment, tròp de plors e tròp de sang e d’incompreneson”, aital son los primièrs mots de Dídac, escriches sus Facebook, quand acabèt la mission. A l’ora d’ara es sul camin de Bolívia, salve e segur.
 
Dídac, amb la comunautat d’observaires internacionals qu’acompanhavan los indigènas fins al 5 de genièr, èran en perilh de mòrt. Mas avèm aprés que Dídac se pòrta plan e que lèu arribarà en Bolívia, segon çò que nos a contat. A bon espèr que lo sieu sojorn entre los indigènas guaranís kaiowás servirà a explicar la situacion de manca de defensa que patisson.
 
Dídac nos a contat que la pression internacionala comença d’arribar en Brasil, quitament l’occitana. “Los guaranís kaiowás an sentit la vòstra fòrça e ara se sentisson mai fòrts. La lucha contunha, plena de lagremas, de sang e de sorires. Bon Dieu! Quin mond tan gentil! Partissi. Mercés de tot còr, en nom mieu e en nom dels kaiowás”, çò a dich.
 
La campanha catalana de sosten crida a una acamp davant lo consolat de Brasil a Barcelona, lo 18 de genièr a 18h, “seriá plan se i aviá mai d’acamps davant las ambaissadas e los consolats de Brasil de pertot”, çò a dich, del temps que nos a precisat que quitament la campanha occitana es arribada sul sit web del comitat internacional.
 
 
L’espoliacion dels guaranís kaiowás
 
La comunautat indigèna guaraní kaiowá es una de las mai nombrosas de Brasil. Solament dins l’estat del Mato Grosso do Sul, n’i a 30 000. Pasmens, pendent los decennis passats, los grands entrepreneires agricòlas los an fòrabandits d’aquelas tèrras, las mai rendablas del país per l’indústria agrària e dels biocarburants.
 
Fa dos meses, a partir d’una nòva menaça de deslotjament, aquela comunautat guaraní publiquèt una letra dobèrta en demandant d’ajuda internacionala. I aguèt de manifestacions e de protèstas per carrièras, e un tribunal de São Paulo suspendèt lo mandat de deslotjament.
 
Mas lo retorn dels guaranís kaiowás en cò lor foguèt recebut amb de fusilhadas de la part dels paramilitars contractats pels entrepreneires. Maites son estats assassinats e fòrça autres se suicidan. Al crit d’ajuda, s’es respondut ara amb aquela comission d’observaires internacionals que los an acompanhats dins lo retorn a las lors tèrras.