Es mòrt Philippe Monguillot, lo menaire del tram’bus de Baiona de cinquanta ans que se trobava espitalizat en mòrt cerebrala dempuèi dimenge passat, a causa d’una agression brutala. Sa filha a explicat que, consents zmb los mètges, avián decidit de “lo daissar partir”. Dimècres, mai de 6000 personas abilhadas en blanc manifestèron per las carrièras de la capitala del Bas Ador en omenatge a Monguillot.
 
Los faches se passèron dimenge 5 de julhet a l’entorn de 19h, quand lo menaire refusèt la pojada a un òme sens masca acompanhat d’un can; a aquel moment demandèt a quatre passatgièrs qu’èran ja dins lo veïcul de portar la masca o de descendre. Es alavetz que l’ataquèron amb una granda violéncia. Los socorses lo menèron a l’espital, inconscient; en seguida, los mètges lo declarèron en estat de mòrt cerebrala.
 
La polícia a qualificat l’agression d’”extrèma violéncia”. Diluns, se detenguèt cinc personas en gàrdia a vista. Dos d’eles son acusats pel ministèri public d’ensag d’assassinat e dos autres son sospechats de refús d’assisténcia. Lo cinquen detengut, menor d’edat, es en libertat.