Dins las mesuras presas per la Superliga per assegurar lo debanament de la sason de 2020 figura la supression de la mesclanha. Cèrts saberuts an trapat que i aviá mai de 100 còps lo risc d’agantar lo coronavirus dins una mesclanha que sus un placatge!

Ja que los ancians romegavan sus las mesclanhas actualas non disputadas…
 
E òc, ont es passat lo temps ont caliá prene lo cap (se petaçar per aver lo cap costat introduccion), ont la primièra mesclanha semblava un exercici bèl d’encloscatge (clòsca contra clòsca) e que, quasi tradicionalament, aquesta primièra mesclanha se relevava per una fièra de trucs e de patacs! E vos parli pas dels talonaires que se suspendián als pilars per talonar dels dos pès (en trapèzi!) o de l’abiletat del segonda-linha per mandar un cachamorre al talonaire o a un pilar de la formacion d’en fàcia… Direm que las relacions entre paquets de davants se son un pauc civilizadas!
 
Los australians, partisans determinats d’un jòc escarrabilhat, presiquèron ja per la supression de la mesclanha. Las autras federacions ne volguèron pas en nom de la pèrda d’un element istoric e tanben de la manca de temps de respiracion e de recuperacion dins la partida. Se n’arribèt al compromés de las mesclanhas formadas mas amb una introduccion que se fa pas pus entre las primièras doas linhas e, a mai la règla interdiga pas de butar, una recuperacion de la palma a  un 99 % (e benlèu mai) per la formacion qu’a l’introduccion. E aquí se vegèt (se vei) de pilars en posicion de dobertura, e plan d’autras disposicions tacticas!
 
Los australians venon d’ajustar la règla de la causida de l’endreit de la mesclanha: a 10 mètres de la tòca, a 20 m, o al mitan del terren. E se vei encara d’ensages que se marcan en primièra man sus una combinason en sortida de mesclanha (i comprés amb despart al ras de l’agropament!).
 
La règla Superliga va eliminar aquel temps de reposicionament estrategic e tanben lo temps per bufar que pren una mesclanha a respècte d’un tengut: ja que lo ritme de las partidas va èsser elevat, se pòt crentar que los jogaires acaben la sason suls genolhs (se se son pas nafrats abans).
 
L’arrièr dels dragons Sam Tomkins s’estona d’aquela causida (esperem que serà temporària) sens consultacion dels jogaires. Òc, nos podèm pausar la question e la faire virar dins totes los senses dins nòstre cabucèl, jol casco o lo bendèl sul cap: “Mas ont son passadas las mesclanhas d’antan?”.
 
 
Superliga: una represa complicada
 
Aprèp aver mandat de tèstes medicals a l’RFL, los catalans an enfin pogut reprene l’entraïnament collectiu aqueste divendres 10 de julh. Mas las causas son pas encara al net per la represa: la question dels salaris es pas reglada dins totas las formacions; qualques equipas vòlon pas venir jogar a Perpinhan qu’aurà dreit a 5000 espectators dins l’estadi alara qu’en Anglatèrra serà pòrta barrada fins al primièr d’octòbre. Acamps e declaracions a la premsa se multiplican e retardan las presas de decision.
 
 
NRL: cada partida tensa vertat
 
En Austràlia, las resultas de las partidas de la novena jornada se pòdon despartir en dos grops: