L’Irlanda del Nòrd es a viure de moments de nauta tension. Dempuèi mai de cinc nuèches, de grops unionistas s’afrontan a las fòrças de seguretat a Béal Feirste (Belfast) per reclamar que se torne plaçar la bandièra del Reialme Unit a l’ostal de la comuna. Los manifestants an lançat d’explosius faches a l’ostal e de balas de gòlf contra los policièrs, e mai an brandat de bandièras unionistas, del temps que los agents los an estancats amb de balas de goma e de canons d’aiga de pression.
 
Lo cap de la polícia de l’Irlanda del Nòrd, Matt Baggott, a explicat que de dròlles qu’avián dètz e onze ans an participat als atacs contra los agents qu’ensajavan de dissòlver las susmautas. Dempuèi dijòus passat, qualques cinquanta policièrs son estats ferits e mai d’un centenat de manifestants son estats arrestats.
 
Las riòtas comencèron lo 12 de decembre passat quand lo conselh municipal de la vila nòrd-irlandesa decidiguèt que la bandièra unionista i seriá sonque dètz e sèt jorns per an.
 
Lo primièr ministre nòrd-irlandés, l’unionista Peter David Robinson, a declarat qu’aquela lei es “precipitada e provocaira”, mas a demandat als manifestants qu’agiscan pas de faiçon violenta.