Enfin! Lo calendièr de la fin de sason de Superliga es establit. Serà pas un pichòt afar d’arribar al tèrme d’aquesta sason!

Un calendièr sens pausa
 
Los Dragons Catalans devon jogar 18 partidas, en prenent en compte los 3 rescontres anullats aqueste ivèrn entre marrit temps e pandemia, mai la Cup qu’entamenaràn en ochen o en quart de finala segon l’engatjament o pas de las formacions del Championship e de League One.
 
Reprendràn doncas lo dimenge 2 d’agost fàcia a St Helens, abans d’anar jogar 4 còps en Anglatèrra: Castleford, lo 8; Salford, lo 15; Wakefield, lo 22 o lo 23 (se jògan pas en 8n de Cup!) e Wigan, lo 30 d’agost. Los dirigents imaginan qualques anars venirs dins la jornada e benlèu una setmana en Anglatèrra a la fin del mes.
 
Vendràn puèi una tièra de 4 partidas a Brutus que tornarà dobrir sas pòrtas a 5 000 espectators lo dijòus 3 de setembre per la recepcion de Toronto, abans las vengudas de Leeds (lo diluns 7), Wigan (lo 10 o lo 11), Warrington (lo 24 o lo 25).
 
Los Sang e Aur acabaràn setembre del costat de Leeds (lo 30). Novèla tièra de 4 partidas a domicili en octòbre: Hull KR (lo 8 o lo 9), Wakefield (lo 14), Hull FC (lo 22 o lo 23), Warrington (lo 25 o lo 26). Lo mes s’acabarà, lo 29 o lo 30, contra Toronto: partida fixada per ara en Anglatèrra mas que los catalans aimarián plan d’organizar a Perpinhan ont reçaupràn St Helens (5 o 6 de novembre) abans 2 desplaçaments a Hull KR (8 o 9) e Huddersfield (12 o 13). Seguiràn mièjas finalas e finala.
 
La part subreerculèa es aquela fin de la competicion amb 6 partidas de jogar en 3 setmanas: mèfi a la lassièra, a las nafraduras e caldrà saupre faire virar l’efectiu!
 
La situacion particulara dels catalans a retardat la mesa en plaça del calendièr. Los malaüroses canadians, eles, jogaràn pas una sola partida sus lor pelena ongan e, de mai, an un problèma de visat pels jogaires dels Antipòdes qu’en principi pòdon pas demorar mai de 6 meses en Anglatèrra! Exit Sonny Bill Williams?
 
Los angleses espèran de poder jogar amb de public a comptar d’octòbre.
 
Las datas retengudas per la Cup son: los 22 e 23 d’agost per d’eventuals 8ns de finala; los 19 e 20 de setembre pels quarts; lo 3 d’octòbre per las mièjas finalas e lo dissabte 17 d’octòbre per la finala; los estadis ont se debanaràn las partidas son pas coneguts per ara.
 
Sky-Sport retransmetrà en Anglatèrra totas las partidas de la competicion del mes d’agost e los Dragons an trapat un acòrdi amb la cadena L’Équipe, en mal d’eveniments esportius en dirècte, que reprendrà qualques partidas que disputaràn otra mar per aquesta mesada (2 partidas en dirècte e de 2 partidas en diferit).
 
 
Penrith pren la primièra plaça en NRL
 
En Austràlia, lo cap de fila Parramatta es susprés per las Aglas de Manly que van menar 22-4. Las Anguialas tornaràn a 22-18 amb un ensag a 6 segondas de la fin. Causisson de temptar pas la transformacion per esperar de recuperar la pauma sul remandadís e anar marcar sus la primièra accion. Mas serà pas lo cas!
 
Dimenge, las Pantèras de Penrith recebián los Vaquièrs que tenguèron còp fins a l’ora de jòc. Fin finala, en ganhant 22-10, Penrith pren la primièra plaça al classament amb un punt d’avança sus Parramatta e Melbourne. Newcastle es a 4 punts e los finalistas de la sason darrièra los Polets e Canberra son a 5 punts. De notar que Canberra a pres lo revenge de la finala passada en s’impausant 24-20 a Sydney.