Qualques mila taxis venguts de tota la region, segon çò qu’a anonciat una intersindicala a La Dépêche, son a blocar Tolosa per protestar contra la reforma del transpòrt sanitari. La lor intencion es d’implantar tres barratges filtrants entre 6 e 18 oras. De protèstas semblablas se debanan a Niça e a Marselha.

En seguida de l’avertiment de l’intersindicala de la Federacion dels Taxis Independents (FTI) e del Sindicat dels Taxistas de la Nauta Garona, publicat ièr dins La Dépêche, tres barratges filtrants se meton en marcha a 6 oras del matin e, fins a 18 oras, an l’intencion de paralisar la Ciutat Mondina.
 
Los taxistas son a protestar contra la reforma del transpòrt sanitari votada recentament per l’Assemblada Nacionala francesa. Segon aquela reforma, los menaires de taxi perdrián l’exclusivitat del remborsament de la Seguretat Sociala per transportar de malauts assistits.
 
“Es tota l’economia del taxi qu’es mesa en causa”, çò declarèt al quotidian francofòn Philippe Vidal, president regional de l’FTI, que pensa que de grands grops se son interessats al mercat. Lo problèma se pausa mai que mai dins los airals rurals on gaireben la totalitat dels taxis viu d’aquelas corsas. “Lo transpòrt sanitari representa sonque 2% del deficit de la Seguretat Sociala”, çò apondèt Vidal.
 
Un autre afar de malcontentament es la concurréncia desleiala de las veituras de torisme amb de menaires que s’es mesa en marcha en 2010. Segon lo representant sindical, son pas aquelas veituras que meton en causa “mas los esplechants, [demandam] que lor calga aver las meteissas restriccions”.