La Cort Suprèma espanhòla se ven d’atribuir lo poder de revocar l’article 100.2 del reglament penitenciari espanhòl, e o fa per enebir que los presonièrs politics catalans pòscan viure fòra de la preson qualques oras per jorn. D’aquel temps, lo meteis tribunal a decidit de reduire a la mitat las penas dels ultradrechistas qu’ataquèron la delegacion de la Generalitat de Catalonha a Madrid l’11 de setembre de 2013. Tot aquò se passa mentre que dins la meteissa cort a començat lo jutjament contra l’elegida independentista Laura Borràs e qu’a Barcelona se jutja lo burèu del Parlament de Catalonha de 2017 e Mireia Boya. De soslinhar qu’es lo primièr procès de l’istòria ont s’es declarat en occitan amb un interprèt.
 
L’aplicacion de l’article 100.2 es (o èra) una competéncia exclusiva de las dichas audiéncias provincialas, de tribunals que correspondon a caduna de las províncias, que pòdon concedir de permesses de sortida als presonièrs. Atal, los presonièrs independentistas catalans gaudisson dempuèi la setmana passada d’un regim dobèrt que lor permet de passar qualques oras per jorn en cò lor e quitament las dimenjadas.
 
Tanlèu beneficiar d’aquel regim, los presonièrs an fach d’entrevistas dins los mèdias (de soslinhar las entrevistas de Jordi Cuixart, de Josep Rull, de Raül Romeva e d’Oriol Junqueras) e an recebut d’omenatges. Per aquela rason, los presonièrs politics an interpretat aquel putsch judiciari coma una punicion e una venjança.
 
Ara, tre que lo ministèri public demandarà que se lève los permeses penitenciaris als presonièrs politics catalans, deuràn tornar en preson dins un regim d’embarrament total.
 

Almenys avui, per favor, per caritat, que ningú digui que necessitem més diàleg que mai. https://t.co/veRPmEN1Rk

— Lluís Llach (@lluis_llach) July 23, 2020

La competència sobre el 100.2 és de l' Audiència provincial, però el Suprem l'assumeix per poder revocar-me'l. No em sorprèn, d'aquest Tribunal no espero justícia, sé que és venjança.

— Carme Forcadell (@ForcadellCarme) July 23, 2020

 
Diminucion de las penas dels ultradrechistas qu’ataquèron la delegacion de la Generalitat
 
Lo meteis tribunal a tanben rebaissat las penas de catòrze ultradrechistas qu’assautèron la delegacion de la Generalitat de Catalonha a Madrid l’11 de setembre de 2013. Aque tribunal los aviá condemnats a 4 ans de preson mas la Cort Constitucionala espanhòla ne suspendèt l’empresonament. Ara, la Cort Suprèma a revisat sa senténcia e a reduchas las penas a 2 ans e qualques meses de preson. Çò pus grèu d’aquela revision de senténcia es que los jutges an afirmat qu’aquela “ataca aviá pas de motivacion ideologica”.
 
Los militants ultradrechistas intrèron dins la delegacion de la Generalitat de Catalonha per empedir l’acte que s’i debanava a l’ocasion de la Diada de Catalonha en 2013. Brandissián de drapèls espanhòls mentre que cridavan “Catalonha es Espanha”. A mai, lancèron de gas lacrimogèn, agarriguèron qualques personas presentas e provoquèron qualques damatges materials. Cap de policièr o empediguèt pas. Demest los ferits i aviá una drolleta de 4 ans e un representant de l’ambaissada dels Estats Units. Los faches foguèron enregistrats per las camèras de television.