Lo sobeiranisme galèc a demostrat sa fòrça aqueste dissabte passat durant lo jorn nacional d’aqueste país qu’ongan s’es commemorat d’una manièra fòrça especiala: d’un latz dins l’encastre de la crisi sanitària de la covid-19 e de l’autre en celebrant lo centenari d’aquela jornada. “Es un sòmi collectiu amb de rasics prigondas”, çò diguèt dins son discors Ana Pontón, pòrtavotz del Blòc Nacionalista Galèc (BNG), partit d’esquèrra sobeiranista. Pontón remembrava cossí en 1919 la fèsta foguèt instaurada per las “Irmandades da Fala” (Frairiás de la Lenga), una organizacion galeguista activa entre 1916 e 1931. Atal lausèt “aqueles òmes e femnas avantgardistas, que fa cent ans festevajan pel primièr còp lo jorn de la Pàtria Galèga” e lors discípols que s’autorganizèron dins la clandestinitat pendent lo franquisme e qu’ara se son amassats dins lo BNG.
 
Pontón defendèt lo galeguisme coma movement que revendica “un avenir digne per lo mond que decidisson de viure e trebalhar al país” e critiquèt la vesita que lo rei d’Espanha fasiá a la catedrala de Compostèla a l’ocasion del jorn de l’apostòl Jaume, a qualques mètres d’ont ela fasiá lo discors. “Galícia a pas cap de rei”, çò declarèt”.
 
L’independentisme galèc es ancorat a esquèrra e se pòrta fòrça plan dempuèi las darrièras eleccions del 12 de julhet passat. Dins aquel sens, Ana Pontón aviá assolidat dins una entrevista per nòstres confraires de Vilaweb, que lo galeguisme coneis una èrsa qu’es a créisser fòrça.
 

#NaWeb@anaponton fixa como reto converter o BNG na forza maioritaria para darlle a Galiza un goberno a favor do país en 2024. #DiaDaPatriaGalegahttps://t.co/n2QCwBAri9

— BNG (@obloque) July 25, 2020

 
 
Serada de solidaritat en Occitània
 
Mentretant a Pau, Libertat aviá organizat divendres una serada de solidaritat amb Galícia en onor de sa fèsta nacionala. Un public atentiu escotèt e pausèt de questions a un militant independentista galèc que vesitava la Tor deu Borrèu per l’ocasion.