La Superliga repren, mas nòstres crits de jòia pòdon pas sortir de nòstras gargantas. Dins d’estadis sens espectators, los Dragons Catalans jogaràn 5 còps en Anglatèrra aqueste mes d’agost. Per contra, sètz dins l’obligacion morala e solidària de gaitar aqueste dimenge 2 lor afrontament amb lo campion St Helens, sus la pelena de Leeds, sus la cadena L’Équipe. E mai qu’aquò: se podètz pas èsser present per fintar la partida, daissatz alucat vòstre televisor sus la cadena esportiva que lo taus d’audiéncia butarà la cadena de contunhar de retransmetre de rugbi de XIII en clar pels telespectators d’Occitània, de Catalonha Nòrd e de totes los parçans de França!

La sufisença anglesa o la triangulacion de la palma ovala
 
Pas mai que 11 clubs per jogar aquesta fin de sason: diluns passat, per comunicat, los dirigents del club canadian de Toronto anonciavan que la formacion se retirava de la competicion: pas de possibilitat de jogar a l’ostal ongan, partença dels jogaires dels Antipòdes en fin de visat en Anglatèrra, refús d’una ajuda financièra.
 
E òc, una part del retard de difusion del calendièr veniá de las dificultats de conciliar la situacion anglesa amb la de Toronto e la dels catalans. Mas, de fait, los clubs angleses son preses dins aquela contradiccion de voler a l’encòp dobrir la competicion (a Toronto, Ottawa, Montréal o Nòva York, als catalans e deman a Tolosa) tot en demorant entre eles. Es un pauc la quadratura del cercle e la triangulacion de la palma ovala.
 
Los beneficiaris de l’afar seràn los Poletons de Sydney que van probablament recuperar per la fin de sason Sonny Bill Williams.
 
Aqueste dimenge, son 2 partidas en retard que se jogaràn: d’en primièr, Dragons-St Helens. Serà seguida de l’afrontament entre los Gigants d’Huddersfield e Leeds.
 
 
Los calendièrs de Federala a Elèit 1 son sortits
 
Dins aqueste retorn esperat a la normala, cal notar la difusion tre ara per la Federacion dels calendièrs pels juniors, las femeninas, las divisions federala e nacionala e tanplan per l’Elèit 1 e l’Elèit 2.
 
Lo campionat d’Elèit 1 reprendrà per Totsants amb lo dèrbi Tolosa-St Gaudenç, Vilanòva reçauprà Palau, Albi serà a Carcassona, Lesinhan traversarà lo pont d’Avinhon e, en cap d’aficha, un Limós contra los Dragonets es programat a l’Agulha. La Dimenjada Magica es prevista la dimenjada dels 21 e 22 de novembre sus un terren pas encara designat.
 
 
NRL: la pluèja desrevelha los Dògols
 
Aquesta fin de setmana, la pluèja se convidèt dins lo debanament de las partidas del campionat australian e compliquèt lo mestrejament de la palma.
 
Los darrièrs, los Dògols de Canterbury, signèron lor segonda victòria de la sason 18-12 sus la pelena de Newcastle qu’aviá perdut sos dos talonaires nafrats abans la mièja ora de jòc . Los arbitres vidèo se senhalèron per una error de las bèlas: un ensag non valid acordat a las Làmias que ganhèron atal de 4 punts contra los Dragons de Sant Jòrdi (28-24). Sancionats sul pic per l’NRL, los dos arbitres vidèo poguèron aital profeitar d’un dimenge a l’ostal!
 
Los 3 primadièrs ganhan: Penrith contra los Titans (22-14), Parramatta fàcia als Tigres (26-16). Dins lo segond temps, Melbourne fa patir un novèl martiri a Brisbane: 46-8.
 
 
Bon anniversari: òm ten pas 100 ans cada jorn!
 
Per festejar sos cent ans d’existéncia, lo club de XIII de Palau del Vidre organiza un concors de fotografia. Sola obligacion: la preséncia en totalitat o pas d’una palma ovala sus la fotografia de mandar d’aicí a aqueste divendres 31 de julh a: centenaire2020@broncos-palau13.com.
 
 
 
 
Alan Roch