capçalera campanha

Actualitats

EconomiaPoliticaSocietat

Las “immatriculacions” o cossí la glèisa catolica espanhòla s’es apoderada d’un fum de proprietats

Gràcias a una lei de Franco e puèi d’Aznar, la glèisa catolica se seriá atribuida environ 40 000 proprietats dins l’estat espanhòl, dont mai d’80 en Aran

| Guilhèm Sevilha
Dins los darrièrs 70 ans, la glèisa catolica s’es emparada dins l’estat espanhòl d’aperaquí 40 000 proprietats dont de capèlas, de glèisas, de cementèris, de bastissas civilas e de terrenhs per bastir. Una lei franquista de 1946, totjorn en vigor, balha als evesques una foncion comparabla a la dels notaris en lor permetent d’inscriure al registre quina proprietat que siá. Aquelas autocertificacions lor dison “immatriculacions” e los evesques las pòdon far sens o raportar a degun, en consequéncia de qué maitas personas, mai que mai d’agricultors, an pas jamai sauput que de terrens o edificis sieus son legalament proprietat privada de la glèisa catolica.
 
En mai d’aquò, l’an 1998, lo govèrn de José María Aznar permetèt que la glèisa catolica enregistrèsse a son nom los luòcs de culte. Dempuèi aquel moment e fins a 2005 i aguèt una èrsa d’”immatriculacions” de catedralas, de glèisas, de capèlas e ermitatges que venguèron proprietat de l’institucion religiosa amb las autocertificacions dels evesques.
 
Per ara, sembla impossible de determinar quantas d’aquelas “immatriculacions” son de panatòris.
 
Lo fach foguèt divulgat en 2018 per un documentari de  la Television de Catalonha del temps que la Fondacion Ferrer i Guàrdia ne publicava un rapòrt detalhat . Ara, qualques ciutadans reclaman lors proprietats.


Una carta interactiva de las “immatriculacions” en Catalonha e Aran 

Lo govèrn de la Generalitat ven de publicar una carta interactiva amb totes los bens de la glèisa “immatriculats” entre 1946 e 2015” en Catalonha e Aran, e a entamenat un servici de mediacion per que las personas que reclamarián una proprietat “immatriculada” al nom de la glèisa catolica pòscan negociar abans d’anar en justícia.
 
En ço que tanh a la Val d’Aran, aquelas “immatriculacions” pertòcan 52 luòcs de culte, 6 bastissas civilas e 23 terrens per bastir.
 


 

abonar los amics de Jornalet

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Pitaluga
3.

La glèisa espanhòla es aquela que benesissiá los canons de Franco, per la "crosada" e per "l'empèri fins a Dieu", coma disián.
Ara, i a de sacerdòts espanhòls que fan de bon trabalh en America latina, e d'unes i an perduda la vida. Es coma lo comunisme : i a l'institucion o l'administracion centrala d'un costat, e d'un autre los que sauvèron lo Jean Ferrat d'èsser enviat morir dins un camp amb sos parents.

  • 11
  • 1
Jacmes Autièr Montalion
2.

Son doás glèisas : una que possedís, que s'i arrapa, que jutja e que condemna, l'autra que perdona, qu'ama, que fugís, e que la primièra brutlarà fins a la solucion finala.

  • 18
  • 1
Franc Bardòu
1.

Una lei franquista de 1946, totjorn en vigor, balha als evesques una foncion comparabla a la dels notaris ? Una lei de la meteissa mena que las que permeton als dictators acutals d'interdire l'accion civica e politica independentista, jos pena pesuga de preison ?

  • 16
  • 3

Escriu un comentari sus aqueste article