L’Escòla Occitana d’Estiu se farà ongan tanben. E mai dins de mesuras de seguretat sanitàrias mai estrictas, e dins un autre emplaçament a Vilanuèva d’Òlt (Naut Agenés), l’eveniment se tendrà del 16 al 22 d’agost.
 
Per assegurar l’albergament e los repaisses, se cal inscriure abans lo 6 d’agost sul sit eoe-oc.org ont trobaretz los prèses e lo programa.
 
 
Un refugi de normalitat occitana
 
L’Escòla Occitana d’Estiu prepausa una setmana de convivéncia dins una residéncia en prepausant una bona escasença d’immersion lingüistica.
 
Se tenon de corses de lenga occitana a totes los nivèls e en totes los dialèctes. Totun, lo programa compren d’autras activitats coma d’obradors, de conferéncias, d’espectacles, de danças, de descobèrtas del terraire e una librariá completa de libres en lenga nòstra.
 
A l’EOE i a de mond de totes los atges, çò que fa que los escambis entre dialèctes e generacions son passionants, mai que mai en tot beure un còp a la beguda, a la fin de la jornada, abans lo balèti o l’espectacle.
 
Pels mai pichons i a l’Escoleta, amb d’activitats per enfants de 5 a 10 ans, e pel jovent d’11 a 16 ans i a l’Escòla dels Adolescents (dicha “Escòl’Adòs”).
 
Los participants son normalament d’occitans que venon de pertot dins lo país, seguits per un grop de catalans plan nombroses. En mai d’aquò, i a sovent de mond de païses plan divèrses. Coma d’abitud, lo Comitat d’Afrairament Occitanocatalan (CAÒC) i serà, en tot portar fòrça participants, se las circonstàncias en Catalonha o permeton. De fach, lo CAÒC collabòra activament a l’organizacion de l’eveniment.