Aqueste dimenge 2 d’agost, èra lo moment de la represa de la sason de Superliga amb doas partidas en retard que se jogavan a Leeds. Los Dragons Catalans i afrontavan lo campion St Helens.

Los Sants coneisson pas la pietat
 
Se lo primièr quart d’ora de la partida foguèt equilibrat, aprèp la sortida del talonaire catalan McIlorum assucat, los Sants prenguèron lo pas suls catalans: mai collectius, mai reactius e amb de jogaires que saupèron faire la diferéncia cada còp que l’escasença se presentava. En fàcia: de corrents d’aire en defensa, de jogaires que se cercavan e d’aproximacions èran al rendètz-vos. Sola satisfaccion: la prestacion del jove arrièr Arthur Mourgue. La nòta finala es salada: 34-6. La setmana serà pas de tota tranquillitat del costat de Perpinhan: McNamara va brandir las pelhas als jogaires!
 
Dins la segonda partida, los Gigants d’Huddersfield se cresián tranquils amb un avantage de 20 punts (26-6) a un quart d’ora de la fin. Mas Leeds encadenèt 4 ensages per tornar a egalitat dins la darrièra minuta. Calguèt passar pel punt en aur: lo tustaire d’Huddersfield manquèt un tombat e, en seguida, Luke Gale, capitèt sa temptativa per balhar la victòria als Rinocèros 27-26.
 
Aquesta dimenjada serà una jornada completa de Superliga que se debanarà. Un còp de mai sus la pelena de l’estadi de Leeds, los Dragons afrontaràn dissabte de vèspre los Tigres de Castleford: un brave talhon encara! La partida se poirà seguir en dirècte sus la cadena L’Équipe.
 
 
Cup: la colèra del president
 
Aprèp l’arrèst de la sason en Championship, los Dragons Catalans se pensavan qualificats pels quarts de la Cup qu’aurián pas a jogar l’ueiten contra Widnes. Ne profeitarián, aquel dimenge 23 d’agost, per se metre a jorn en Superliga en jogant la partida en retard contra Wakefield! Mancat: los responsables angleses decidiguèron de tornar faire lo tiratge al sòrt: sièis clubs qualificats pels quarts e las darrièras doas plaças de ganhar dins una partida de barratge. E aquí, los Dragons i son de jogar contra… Wakefield e la partida de campionat de plaçar dins un calendièr mai qu’encombrat. Pastisson en present per aquela copa de tè: la partida se jogarà a Huddersfield, un viatge de mai per Anglatèrra pels catalans!
 
Comentari del president Guasch, vendeire de carn en gròs e malcontent d’aqueste tiratge: “Aqueles angleses nos prenon per de cambajons de Baiona o de salsissòts Mirelha (una mena de salsissòt industrial)!”.
 
 
NRL: al son del digeridó
 
Aquesta jornada d’NRL èra, coma cada an, dedicada als pòbles indigènas: las esquipas jogavan amb de malhòts dels dessenhs d’inspiracion aborigèna; messatge abans las partidas; un còp de digeridó.
 
Las cinc formacions en cap de classament contunhan de ganhar: Penrith 42-12 a Manly, Parramatta 18-16 contra los Dògols (aprèp aver menat 18-0), Melbourne 26-16 contra Newcastle; los Polets dificilament 18-12 contra los Titans e Canberra de dos pichons punts 14-12 fàcia als Vaquièrs.
 
 
 
 
Alan Roch