Lo rei emerit espanhòl, Joan Carles Ir, a comunicat la decision d’abandonar l’estat espanhòl après la seguida d’informacions escandalosas rendudas publicas. Dins una letra adreiçada a son filh Felip VI, l’assabenta de sa decision de quitar Espanha a causa de las acusacions de corrupcion, en i apondent qu’o fa per “afan de servici a Espanha”. L’Ostal Reial espanhòl a rendut publica la letra que podètz legir aicí.
 
Concretament, Joan Carles de Borbon ditz qu’a pres aquela “decision perpensada” per “facilitar” l’exercici de las foncions de monarca a Felip VI, après la “repercussion publica” qu’an “cèrts eveniments del passat” de sa “vida privada”, en apelant a son “legat”e a sa “dignitat coma persona”. Dins aquel sens, assegura que pendent los gaireben quaranta ans de son regne a “totjorn volgut çò melhor per Espanha e la Corona”. Felip VI a transmés a son paire son “respècte afectuós” e  sa “gratitud” per sa decision.
 
 
Inviolable
 
En març passat, lo burèu del congrès dels deputats espanhòl refusèt una enquista sus Joan Carles Ir per de comptes irregulars e un emblanquiment de cabals après que la Cort Constitucionala aguèt confirmat que la figura del rei, segon la Constitucion, èra inviolabla. Atal o diguèt la pòrtavotz del PSÒE Adriana Lastra: “Cal simplament legir la Constitucion per saber que lo rei es inviolable”.
 
 
Enquista de la Cort Suprèma
 
Lo procuraire de la Cort Suprèma espanhòla, totun, anoncièt l’intencion de metre en examen la corrupcion de la monarquia espanhòla. L’enquista, dobèrta fa dos meses, cèrca d’avalorar se Joan Carles aviá comés d’emblanquiment de fonzes e un delicte fiscal pertocant lo bastiment de la linha de nauta velocitat de la Meca a Medina (Arabia Saudita). Segon lo procuraire, lo rei emerit quitèt d’èsser inviolable e per tant se pòt jutjar los delictes qu’auriá comeses après son abdicacion. Pasmens, lo pòdon pas jutjar per cap de delicte comés mentre qu’el èra rei.
 
De son caire, Òmnium Cultural a fach una denóncia contra Joan Carles Ir, que son admission es pas encara resolguda.
 
 
Una fortuna amagada en Soïssa
 
En març passat, de nòvas revelacions sus la fortuna amagada de Joan Carles Ir indicavan qu’en 2008 aviá depausat cent milions de dolars dins un compte bancari a Genèva. Coma o publicava La Tribune de Genève, aquel argent èra un present del rei Adb Allah d’Arabia Saudita. Lo compte èra dins la banca Mirabaud e al nom de la Fondacion Lucum, una entitat panamenca que lo sol beneficiari n’es justament Joan Carles de Borbon.
 
Segon lo quotidian soís, lo rei espanhòl retirèt d’argent d’aquel compte pendent qualques annadas, fins qu’en 2012 una bona part de çò que ne demorava, environ 65 milions, foguèron remeses a Corinna zu Sayn-Wittgenstein, mestressa del monarca, que los depausèt dins la filiala d’una autra banca de Genèva a las illas Bahamas. Aquelas transaccions, que fins ara èran pas publicas, son somesas a una enquista criminala de las autoritats soïssas, que las considèran “suspèctas d’emblanquiment de cabals”.
 
En mai d’aquò, dins los darrièrs meses son estats coneguts los estatuts de la Lucum Foundation, entre d’autras revelacions publicadas per la premsa espanhòla. Lo document, signat pel rei emerit espanhòl, demòstra qu’el e Felip VI son los principals beneficiaris de la societat.