De representants dels govèrns d’Etiopia, Egipte e Sodan an tornat reprene las convèrsas sul Grand Barratge de la Renaissença d’Etiopia, segon çò qu’a raportat lo Ministèri de l’Irrigacion de Sodan. Pendent tota la setmana, los representants dels tres païses auràn de convèrsas e en seguida i aurà de sesilhas amb d’especialistas. En 2015, los tres govèrns signèron una declaracion de principis ont s’establissiá de condicions per contunhar la construccion de la restanca. Mas de diferéncias entre los tres païses paralizèron lo dialòg. Ara las convèrsas an représ amb d’observaires internacionals e la mediacion de l’Union Africana.
 
Lo projècte es de bastir sul Nil Blau la restanca idroelectrica pus granda d’Africa (e la 7a del Mond) amb una poténcia de 6450 MW. Se rendèt public en 2011 e ne comencèt la construccion en 2013. Los trabalhs deurián durar fins a 2022. Pasmens, lo projècte tròba l’oposicion de Sodan e Egipte, que crenhon una diminucion de l’apòrt d’aiga e d’aluvions.
 
En 2017, los trabalhs èran acabats al 60%. Quand la restanca serà finida, caldrà esperar entre 5 e 15 ans per que lo sit siá tot plen d’aiga.