La nòva edicion que se prepara del Diccionario de la Real Academia de la Lengua Española (DRAE) cambiarà la definicion del mot referendum (en espanhòl: referéndum).

Dins l’edicion actuala, lo primièr sens es aqueste: “Procediment juridic a travèrs del qual se somet al vòte popular de leis o d’actes administratius, que se prepausa que lo pòble los ratifique.” Dins la nòva edicion, que se publicarà en 2014, la definicion cambiarà “actes administratius” per “decisions politicas amb caractèr decisòri o consultatiu”. La nòva definicion ja se pòt consultar sul sit web de l’acadèmia espanhòla.
 
La definicion del mot referendum, en lo diccionari de la Reiala Acadèmia de la Lenga Espanhòla (RAE), a doas accepcions. La segonda, que fa referéncia a la “despacha ont un agent diplomatic demanda al sieu govèrn d’instruccions nòvas sus qualque ponch important”, s’i mantendrà. Mas la primièra cambiarà:
   
L’edicion actuala del diccionari de l’Acadèmia de la Lenga Espanhòla es la vint e dosena, que se publiquèt en 2001. Dempuèi, s’es fach de cambiaments dins las definicions de milièrs de mots, e los que se son faches dins los cinc ans passats se pòdon consultar sul sit web de la RAE; s’agís d’un avançament de çò que i aurà dins la vint e tresena edicion, que se deu publicar en 2014.
 
Lo fach que se càmbie lo sens del mot referendum pòt semblar una coïncidéncia amb lo procès politic en Catalonha, que deu far una consulta sus l’independéncia justament en 2014, segon lo fuèlh de rota convengut entre CIU e ÈRC.
 
De fach, aquel cambiament dins la definicion que diga “amb caractèr decisòri o consultatiu” es pro considerable segon çò qu’afirman de juristas consultats pel jornal catalan Vilaweb.
 
Dison que, quand en un tribunal i a divergéncia d’interpretacion sus un concèpte, un dels critèris que s’aplica, al delà de la jurisprudéncia, es la definicion del diccionari de la RAE.