Japon a tornat revendicar lo desarmament nuclear a l’ocasion del 75n anniversari del bombordament atomic d’Hiroshima, l’atac mai ferotge de l’istòria de l’umanitat. La vila japonesa se recòrdèt ièr de l’eveniment dins una ceremònia que se tenguèt amb un public restrench, d’aperaquí 800 personas, a causa de la covid-19. Lo cònsol màger d’Hiroshima, Kazumi Matsui, faguèt una crida a l’aplicacion del Tractat sus l’Enebicion de las Armas Nuclearas aprovat fa tres ans per l’ÒNU.
 
 
L’atac mai ferotge de l’istòria de l’umanitat
 
Lo matin del 6 d’agost de 1945, la vila d’Hiroshima visquèt un dels atacs mai ferotges de l’istòria de l’umanitat. L’armada dels Estats Units i lancèt “Little Boy“, la primièra bomba nucleara utilizada contra de personas. La bomba tuèt sul pic 80 000 personas, mas a la fin d’aquela annada los mòrts deguts a la bomba èran 140 000 e dins los ans seguents, la chifra tragica contunhèt de créisser.
 
L’atac atomic èra estat precedit per un periòde de sièis meses d’intenses bombardaments estrategics amb de bombas convencionalas sus seissanta sèt vilas japonesas. Tres jorns après lo chaple d’Hiroshima, Harry S. Truman, lo president dels Estats Units, lancèt una autra bomba atomica sus Nagasaki, ont moriguèron 80 000 personas de mai. Aquò forcèt la capitulacion de Japon e metèt fin a la Segonda Guèrra Mondiala.
 
A causa dels bombardaments moriguèron 246 000 personas que la majoritat èran de civils. Fòrça mond demorèron ferits per tota la vida. Los subrevivents son apeladas “hibakusha“, qu’en japonés vòl dire “persona bombardada”. Maites an sofèrt de desfiguracions e de malautiás causadas per las radiacions, coma lo càncer. La deterioracion genetica a afectat qualques generacions posterioras jos forma de malautiás o de malformacions.