Nos quitèt dissabte passat a Batatais (São Paulo) l’evesque Pere Casaldàliga a 92 ans. Restacat a la teologia de la liberacion, èra considerat coma “l’evesque del pòble” e se batèt long de tota sa carrièra en Brasil pels dreches dels pòbles indigènas e la lucha contra la violéncia dels grands agricultors.
 
Lo religiós catalan èra reconegut en Brasil per son intens prètzfach social e sas posicions renovairas de la glèisa catolica. Èra un evesque geinant pel Vatican fins al ponch qu’en 1988 lo papa Joan Pau IId lo cridèt a Roma per que s’expliquèsse e qu’en 2003 li comandèt de quitar sa diocèsi, çò qu’el faguèt pas.
 
Casaldàliga aviá fondat una mission en Araguaia, en plena Amazonia, un país que quitariá pas jamai. En 1971 lo nomenèron evesque de São Felix do Araguaia e, lo meteis jorn de sa nominacion, publiquèt un document qu’analisava los cases d’esplecha dels petits agricultors e los indigènas de la region. A causa d’aquò recebèt divèrsas menaças de mòrt e escapèt miraculosament a plusors temptativas d’assassinat.
 
Pendent gaireben cinquanta ans bastiguèt una glèisa populara e dobèrta que luchèt pels pus paures. A mai, fondèt divèrses movements socials e pastorals qu’a l’ora d’ara son una referéncia coma la Comission Pastorala de la Tèrra e lo Conselh Indigenista Missionari.
 
Las funeralhas an luòc dins tres endreches diferents de Brasil, dissabte a Batatais, uèi a Ribeirão Cascalheira e ièr a São Felix de Araguaia ont l’evesque demorava e ont l’an enterrat. Aquesta ceremònia se retransmetèt en dirècte per Internet: