Un òme de 52 ans se suicidèt lo 2 d’agost passat dins la preson marselhesa de las Baumetas. E mai patiguèsse dempuèi plusors annadas una depression prigonda, l’avián plaçat en detencion provisòria per aver crebat de pneumatics, çò rapòrta La Marseillaise “Mon fiu es estat la victima tragica d’una tiera d’incompeténcias, de fautas e d’insensibilitat”, çò a denonciat Jean Viviani, lo paire de la victima. “Es mòrt per de pneumatics. De pneumatics an pesat mai que sa vida. La perspectiva d’un segond mes de detencion li es estada insuportabla”.
 
Luc Viviani èra un ancian ensenhaire de matematicas al licèu Joliot-Curie d’Aubanha (País Marselhés). Èra precòçament retirat dempuèi cinc ans per de problèmas psiquiatrics grèus. Lo 28 de junh passat, los gendarmas l’avián arrestat a Ròcavaira per aver crebat los pneumatics d’un veïcul.
 
Après 48 oras de gàrdia a vista foguèt examinat per un mètge a sa demanda. Sul pic, lo tribunal demandèt una avaloracion psiquiatrica, mas l’expèrt designat èra en comjat. Per tant, lo faguèron encarcerar en preson preventiva a las Baumetas. L’audiéncia seguenta se tenguèt lo 28 de julhet, totjorn amb l’abséncia de l’avaloracion medicala, e per aquela rason lo tribunal decidiguèt un nòu ajornament. L’avocata de l’acusat, Louise Lanata, avertiguèt lo tribunal del risc que son client se suicidèsse, mas la presidenta del tribunal respondèt que “podiá pas admetre un cantatge au suicidi”.
 
Ça que la, se podiá ben remarcar que l’estat de santat mentala de Viviani èra grèu. Al moment de la detencion se poguèt remarcar l’obsession amb la quala crebava los pneumatics de la meteissa veitura. A mai, dins la procedura judiciària Viviani s’èra nafrat mai d’un còp en se bandissent plan violentament lo cap contra una clauson de veire e en preson s’èra entalhat los braces. Enfin, lo 2 d’agost passat, lo trobèron penjat dins sa cellula a 6h15 malgrat la preséncia d’un codetengut de 70 ans.
 
Luc Viviani vesiá un psiquiatre dempuèi 30 ans. Luchava contra una depression grèva amb lo sosten de sa familha. Ara, sa femna Nicole e son paire an fach lor denóncia contra X per non-assisténcia a persona en perilh e omicidi involontari.

 

 

#Prison Un homme de 52 ans est mort dimanche dans sa cellule des Baumettes. Il était en détention provisoire depuis 1 mois pour avoir crevé des pneus. Il souffrait de fort troubles psy, de nombreuses alertes avaient été données sur les risques suicidaires.https://t.co/EnLglWrxUv

— OIP (@OIP_sectionfr) August 12, 2020