Segon lo libre Guinness dels recòrds, Happy Birthday to You(Polit anniversari) es la cançon mai coneguda en anglés. Pasmens, fòrça mond sabon pas que Warner n’a totes los dreches e que recòbra, cada an, dos milions de dolars solament per l’aparicion d’aquel aire dins de filmes e de sèrias. La cançon deviá èsser de domeni public en 1991, mas an esperlongat lo copyright fins en 2030 als Estats Units, e fins en 2016 en Euròpa. Per ensajar de rectificar la situacion, Free Music Archive a lançat un concors per i trobar d’alternativas amb la licéncia Creative Commons.
 
Free Music Archive, doncas, encoratja los musicians de tot lo Mond a compausar una cançon que remplace Happy Birthday, amb “una melodia que los enfants pòscan cantar sens èsser perseguits”. Los que i vòlgan participar an encara un pauc de temps fins al 13 de genièr. Una jurada formada, entre d’autres, pel promotor de las licéncias Creative Commons, Lawrence Lessig, anonciarà la version ganhanta lo 29 de genièr.
 
La cançon es òbra de doas sòrs de Kentucky (Estats units), Mildred Jessica Hill e Patty Smith Hill, e se publiquèt per lo primièr còp en 1893 dins lo libre Song Stories for the Kindergarten. Jessica Hill la depausèt en 1935 en nom de l’editor Clayton F. Summy Publishing Company e los dreches d’autor passèron mai tard a Warner. Aqueles dreches devián expirar en 1991, mas se son renovelats e seràn en vigor fins en 2030 als Estats Units, e fins en 2016 en Euròpa.
 
En los vidèos çai jonches se pòt escotar doas de las cançons alternativas qu’existisson en occitan. S’agís de la cançon Polit anniversari de Mauresca Fracàs Dub e de la version aranesa de TV3, Per molti ans.