Las competicions tretzistas vivon al ritme de las mesuras estatalas e de las decisions de las federacions a respècte de la situacion sanitària. Las constrenchas novèlas pòdon complicar lo debanament de la Superliga e los desplaçaments catalans. Cèrts neozelandeses començon de trapar lo temps long en Austràlia ont los Warriors devon demorar lo temps del campionat NRL.

Operacion comando pels catalans
 
Los catalans an lo dreit d’anar jogar en Anglatèrra: en avion privat; en autocar dirècte de l’aeropòrt a l’estadi e retorn tre la partida acabada, sens crosar degun mai que la formacion advèrsa sul pelen. De mai, aquesta setmana cambièron d’adversari aprèp lo confinament per 14 jorns de las esquipas d’Hull FC e Salford. Ne profeitèron per jogar aqueste dissabte a St Helens la partida de retard qu’avián de disputar contra Wakefield, mas n’an una ara de reportada a una data… ulteriora contra Salford!
 
Un còp sus la pelena, los catalans faguèron una demostracion d’enveja collectiva e de jòc ofensiu: daissèron pas alenar Wakefield; menavan 24-0 a la pausa e la partida s’acabèt sus la marca de 58-0: dètz ensages, uèit transformacions e una penalitat noiriguèron aquel cabdal. Còps de capèl (tres ensages) per l’alièr Davies e lo segonda-linha Whitley, un ensag aprèp un desenat de passas signat per Yaha, Langi mèstre dels aires a la recuperacion del jòc al pè, lo sens del jòc de Sam Tomkins e James Maloney,… Ara, caldrà capitar de demorar sus aquel ritme. Los catalans tornaràn trapar Wakefield tre dissabte, mas aqueste còp sus la pelena d’Huddersfield per una partida eliminatòria de la Cup.
 
Un tombat fa la diferéncia per la victòria dels Lops de Warrington suls Gigants d’Huddersfield: 19-18. Castleford resistís a St Helens, mas un ensag del pianenc Théo Fages met un tèrme a las pretensions de victòria dels Tigres (0-10). Amb una victòria 28-10 fàcia a Leeds, Wigan demòra cap de fila de la competicion. Lo dimenge 30 d’agost de vèspre, los Dragons jogaràn justament contra Wigan dins una partida que serà retransmesa en dirècte per la cadena L’Équipe.
 
 
NRL: los Polets desplumats
 
En perdent 26-24 a Newcastle, las Aglas de mar de Manly dison adieu a una possibla qualificacion per las pelhòfas.
 
En cap de classament, la Tempèsta de Melbourne va batre los Polets de Sydney 24-6, mas la formacion de Trent Robinson a una esquipa completa a l’infirmariá. Los entraïnaires dels 2 clubs sotalinhan que los jogaires pòdon pas seguir lo ritme mai sostengut impausat per las règlas novèlas qu’aumentan de mai del 10% lo temps de jòc efectiu.
 
Los Dragons de Sant Jòrdi fan plegar Parramatta 14-12 e los Lapinons passan una penalitat e un tombat dins las darrièras minutas per ganhar 31-30 cò dels Vaquièrs.
 
Aqueste dijòus 20 d’agost, en cap d’aficha de la quinzena jornada, l’oposicion entre Parramatta e Melbourne: lo tresen reçaup lo segond.
 
 
 
 
Alan Roch