Los manifestants meses en libertat en Bielorussia denóncian que los a torturats la polícia. Amnestia Internacionala a amassat los testimoniatges e los a jonches dins un rapòrt sus las mesuras repressivas del govèrn de Lukashenko. “Totes los que son estats encarcerats d’una manièra arbitrària amb de procediments administratius o criminals devon èsser meses en libertat sul pic”, çò reclama l’organizacion umanitària. “Volèm lo plen contraròtle d’una violacion massissa dels dreches e de torturas en Bielorussia”, çò dison sus Twitter. A mai, an comunicat que sabon que i a de detenguts que los an desvestits, tabasats e menaçats d’agression sexuala los policièrs.
 
 
Marcha per la libertat
 
Dimenge passat, après uèch jorns intenses de protèstas, se tenguèt una granda manifestacion a Misnk nomenada Marcha de la Libertat qu’amassèt aperaquí 200 000 personas. Los manifestants demandèron la demission de Lukashenko e la liberacion dels manifestants encarcerats.
 
Mentretant, la principala candidata de l’oposicion, Svetlana Tikhanovskaia, es refugiada en Lituània après refusar los resultats electorals del dimenge precedent. Las protèstas contra lo resultat e las eleccions son totjorn vivas e mai intensas del temps que la repression aumenta.  Per ara, segon de donadas oficialas de l’administracion bielorussa, doas personas son mòrtas e i a de centenats de manifestants detenguts.
 
Aleksandr Lukashenko afirma qu’a ganhat las eleccions amb l’80% dels vòtes. Après 26 ans de poder ara vei que son mandat es en perilh mentre que las manifestacions contra son regim se multiplican.
 
 
Putin prepausa de sosten militar a Lukashenko
 
Mentretant, lo president rus, Vladimir Putin, a assegurat lo sosten militar del Kremlin a Bielorussia, “se cal e se s’aplica una pression extèrna sul país”. “T’ai pas jamai traït e o fariái pas jamai”, a promés Putin a Lukashenko.
 
Russia vòl preservar l’statu quo pòstsovietic en Bielorussia, que la considèra coma una zòna estrategica per amortir l’influéncia de l’OTAN e pel transpòrt de l’energia a l’oèst del país. De son latz, l’Union Europèa l’avertit de sancionar los foncionaris responsables de la violéncia policièra e de la frauda electorala.



 

Belarussian Interior Minister's “apologies” for “excesses” & some released won’t do. All those arbitrarily imprisoned, under criminal or admin proceedings, must be freed now! We want full accountability for mass violations of rights, inc. torture, in #Belarus.

— Amnesty International (@amnesty) August 14, 2020