CAPÇALERA PAIS INVISIBLE

Actualitats

InternacionalPoliticaSocietat

Marròc: an encarcerat lo jornalista engatjat Omar Radi

Denoncièt la corrupcion e las violacions dels dreches umans. Son encarceracion es lo compliment d’una campanha estatala de secutament policièr, mediatic e judiciari que s’es intensificada aquestes meses

Es encarcerat en Marròc Omar Radi, un jornalista independent que denoncièt las violacions dels dreches umans e la corrupcion politica. Es acusat d’atemptat contra la pudor, viòl e atemptat contra la seguretat de Marròc. Amnestia Internacionala e Human Rigths Watch asseguran que se tracta de denóncias falsas per lo far calar. Vilaweb ne publica un bèl rapòrt.
 
Dempuèi lo 29 de julhet es dins la preson d’Oukacha, a Casablanca, dins una cellula d’isolament. Lo jutjament es previst pel 22 de setembre. Son encarceracion es lo compliment d’una campanha estatala de secutament policièr, mediatic e judiciari que s’es intensificada aquestes meses.
 
La Cort d’Apellacion de Casablanca a declarat que, delà las cargas per delicte sexual, Radi es acusat d’atemptat contra la seguretat exteriora de l’estat per aver tengut de relacions amb agents d’autoritats estrangièras per portar tòrt a la situacion militara e diplomatica marroquina; e d’atemptat contra la seguretat interiora, per aver recebut de fonzes de l’estrange per portar tòrt a l’integritat, la sobeiranetat e l’independéncia del reialme e alterar la leialtat dels ciutadans envèrs l’estat e las institucions.
 
Nascut en 1986, Omar Radi es un jornalista independent e militant d’ATTAC/CADTM Marròc qu’a patit d’atacas constantas del govèrn per aver denonciat las violacions de dreches umans e las connexions entre los interèsses politics e entrepresarials en Marròc. A recebut de prèmis pel jornalisme d’investigacion e a collaborat amb de mèdias internacionals.
 
 
 
   
 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article