An fach a Wuhan (China) una granda fèsta de musica electronica dins l’aiga qu’a amassat de milièrs de personas sens distància de seguretat ni mascas. Segon qualques mèdias, es un imatge que mòstra lo retorn a la normalitat d’aquela vila que foguèt la primièra a èsser confinada per la covid-19. Per d’autres, s’agís d’un eveniment fòrça polemic.
 
La fèsta reüniguèt de milièrs de personas dins un pargue aqüatic qu’a l’ora d’ara permet l’intrada al 50% de sa capacitat. Los imatges difusats per l’AFP mòstran una molonada de festejaires sens cap de restriccion de seguretat qu’obsèrvan l’espectacle dins l’aiga o sus batèls conflables, e que dançan al son de la musica tècno.
 
Wuhan foguèt la primièra vila ont se raportèt la covid-19; la vila foguèt isolada e sos abitants confinats pendent 76 jorns entre genièr e abril. Dempuèi lo mes de mai s’es pas notificat cap d’autre cas d’infeccion pel coronavirus. Ara Wuhan cèrca de tornar amodar son economia grèvament afectada per la pandemia.
 
En China se contunha de limitar los desplaçaments e se pòrta la masca en public. Totun, lo coronavirus es estat ben contrarotlat e dins los darrièrs jorns an a pena qualques desenas de nòus cases de covid-19, segon las donadas oficialas.