Las societats que dominan lo mercat de las botelhas d’oxigèn espitalièr, mai que mai Linde e Air Liquide, an fixat de prèses extrèmament nauts pels espitals d’Africa en plena pandemia de la covid-19. De soslinhar que l’oxigèn es indispensable pel tractament dels malauts grèus d’aquela malautiá. Segon un reportatge del The Guardian, los espitals d’aquel continent rescontran de prèses e de manièras d’operar biaisses inassumibles e se tròban dins una situacion critica.
 
Lo grop Linde a pas volgut far cap de comentari als jornalistas de The Guardian en disent solament qu’eles se limitan a far “tot çò possible per contunhar de provesir en oxigèn d’una faiçon fisabla” sos clients. De son latz, Air Liquide a respondut qu’an “fach tot çò possible per assegurar la fornidura pendent la pandemia” en soslinhant lor engatjament per “assegurar que lo pus grand nombre possible de pacients en Africa subsahariana recépian un tractament” e que trabalhan amb “l’UNICÈF e d’autras institucions internacionalas, de govèrns e ONG per aumentar l’accès a l’oxigèn dins la region”. Ça que la, Air Liquide vend l’oxigèn espitalièr un 30% pus car que l’industrial.
 
L’oxigèn es lo tractament principal que recebon dins los espitals los pacients de la covid-19 e s’emplega al moment de levar l’assisténcia respiratòria. Quand los palmons son infectats, los nivèls d’oxigèn dins lo sang pòdon tombar d’un biais inquietant. En mai d’aquò, la majoritat dels malauts que presentan de simptòmas leugièrs auràn tanben besonh d’oxigèn a l’espital.
 
Per ara, los espitals de Nigèria, Kenya, Burkina Faso, Guinèa, Sud-Africa, Sud-Sodan, Cameron, Etiopia e Tanzania, entre d’autres estats, patisson la manca d’oxigèn, çò assegura lo rapòrt de The Guardian.
 
D’ancians trabalhadors dels espitals e d’analistas interrogats pel mèdia britanic suggerisson que qualques companhiás d’oxigèn an capitat un profièch net d’un 45% a un 88% dins lors provesiments als espitals africans.
 
 
“D’aire abondós” produch en Kenya
 
Los mètges Steve Adudans e Bernard Olayo, del Centre de la Santat Publica e del Desvolopament de Kenya, obtenguèron un finançament per installar una usina d’oxigèn nomenada Hewatele (“aire abondós” en kiswahili). Dessenhèron un sistèma per emplir gratuitament las botelhas d’oxigèn dels espitals, en fornissent d’oxigèn a las zònas ruralas pel primièr còp.
 
Rapòrtan que tre l’installacion de l’usina un representant kenyan de la British Oxygen Company lor demandèt que la barrèsson e que distribuiguèsson son oxigèn. O refusèron.
 
Ara an capitat a installar doas autras usinas e mai ajan de suportar de fòrtas pressions.

 
 

Wow!@madlendavies exposes the vested interests behind #oxygen in #Africa for @guardian 1/x

Fighting for breath: how the medical oxygen industry is failing African hospitals@Stop_Pneumonia@guardianhttps://t.co/JuL5byKqGc

— Hamish Graham (@GrahamHamish) August 10, 2020

 

#COVID19 has exposed urgent need for action on access to medical oxygen across #Africa. Now is the time! #OxygenForAll@CHAI_health@MCRI_for_kids#EveryBreathCounts@_AfricanUnion@AfricaCDC@WHOAFRO@TBIJ@guardian@MobilePunch@macfound@k_molyneauxhttps://t.co/WP7XAjrs8n

— JustACTIONS (@JustACTIONS) August 12, 2020