Steve Bannon, lo conegut e polemic èx-conselhièr del president dels Estats Units, Donald Trump, l’an arrestat per aver fraudat, presumidament, de centenats de milièrs de dolars dins una campanha de collècta de fonzes per la bastison del mur frontalièr amb Mexic, la proposicion màger de la campanha de Trump en 2016. L’iniciativa sonada “We Build The Wall” (Bastissèm lo Mur) obtenguèt 25 milions de dolars. La procuraira federala del districte sud de Nòva York (Manhattan), Audrey Strauss, acusa Bannon e tres autras personas d’aver panat tot aquel argent.
 
Segon un comunicat del ministèri public, los acusats “an fraudat de centenats de milièrs de donaires, en aprofechant lor interès per la bastison del mur per obténer de milions de dolars jos la falsa escampa que tot aquel argent serviriá per lo bastir”.
 
 
Propagandista màger de l’ultradrecha en Euròpa
 
Bannon es una de las figuras pus inquietantas de la politica internacionala. Ancian quadre superior de Goldman Sachs e èx-director de la revista numerica ultradrechista Breitbart News, capitèt la victòria de Donald Trump a la presidenciala estatsunidenca e foguèt lo conselhièr del president. Es el que prepausèt la règla d’interdire l’intrada de totes los ciutadans musulmans als Estats Units. Lo forabandiguèron puèi de l’Ostal Blanc.
 
Totun, gràcias a sos contactes amb las familhas pus ricas dels Estats Units, aguèt lo sosten economic per espandir sa pensada ultradrechista per Euròpa en finançant l’extrèma drecha del Vielh Continent. Son projècte, apelat The Movement, a establit d’escòlas per la formacion de nauts foncionaris ultradrechistas e a collaborat amb de politicians coma Matteo Salvini, Marine Le Pen e Viktor Orbán (que lo considèra coma son eròi) en lor prepausant de tecnicas de propaganda en linha, d’idèas e, evidentament, d’importants dons pauc verificables.
 
En junh d’arunan, l’estat italian barrèt son universitat de politicians ultradrechistas, que Bannon aviá plaçada dins la chartrosa de Trisulti. Aquí se formavan de politicians “crestians” capables de “promòure los fondaments judeocrestians de la civilizacion occidentala”. Las autoritats rebutèron la licéncia d’usatge del sit per de presumidas “violacions” del contracte.

 

"Despite the populist aura he tries to project, Mr. Bannon is known to enjoy the high life, and he was arrested at 7:15 a.m. on a $35 million, 150-foot yacht belonging to one of his business associates, the fugitive Chinese billionaire Guo Wengui" https://t.co/AKEBNiQwCK

— Brian Walsh (@brianjameswalsh) August 21, 2020