Macron e Merkel se son amassats per alestir la rintrada e o an fach en país provençal de Mauras, a Bregançon, ont los presidents franceses tenon lor residéncia d’estiu. Èra lo primièr còp que la cancelièra vesitava lo fòrt de Bregançon, e lo primièr còp dempuèi 1995 qu’un dirigent alemand i anava, çò que mòstra la bona sintonia entre los govèrns de París e Berlin.
 
En aquesta fin d’estiu “l’agenda intenacionala es particularament cargada”, çò raportèt l’Elisi. E sembla qu’o es; los dos caps an parlat de la covid-19, de l’explosion en Liban, de Bielorussia e de las tensions en Mediterranèa orientala e encara del còp d’estat en Mali, del Brexit...
 
Per totas las questions, semblan d’aver adoptat un fuèlh de rota comun, segon çò que declarèt lo president francés als mèdias après la reünion. Après dos ans de divergéncias, las doas poténcias europèas ara s’endevenon plan.
 
 
Coordinacion europèa fàcia a la covid-19
 
Macron e Merkel vòlon ara una coordinacion europèa fàcia a la crisi de la covid-19, e non pas que cada govèrn afronte d’un biais diferent la crisi sanitària qu’arribèt en març passat. “Podèm pas tornar confinar tot un país”, çò assegurèt la cancelièra, qu’aconselhèt que los nòus brots foguèsson tractats a travèrs de restriccions als nivèls local o regional. Una posicion que Macron parteja. A mai, Merkel defendèt que “cal evitar a quin prètz que siá un barrament de las frontièras” europèas. E Macron diguèt que “i a de perspectivas rasonablas” que se tròbe un vaccin “dins los meses avenidors”.
 
 
Fermes davant las ambicions d’Erdoğan
 
Quant a las tensions en Mediterranèa orientala, Merkel es pas contra lo fach que França mande de vaissèls, e mai Alemanha preferisca que se reprenga lo dialòg entre Grècia e Turquia. Los dos dirigents son d’acòrdi per se mostrar fermes davant las ambicions d’Erdoğan.
 
 
Que Bielorussia venga pas una autra Ucraïna
 
Enfin, quant a la situacion a Bielorussia, París e Berlín desiran pas la repeticion de las errors del passat; “Volèm pas que se produga una replica de çò que se passèt en Ucraïna”, çò assolidèt lo president francés.

 
 

WoW !!

European leaders , Macron and Merkel greet each other with  Namaste during Bilateral meet pic.twitter.com/3lGAkzUH0w

— Megh Updates  (@MeghUpdates) August 20, 2020

 

Now and then. Macron greeting Merkel at the Fort de Brégançon this afternoon. Kohl and Mitterrand there in 1985, the last time a French president hosted a German chancellor at the official presidential retreat on the Med pic.twitter.com/wjY2zlxffa

— Sophie Pedder (@PedderSophie) August 20, 2020