Lo president de l’Eurogrop, lo luxemborgés Jean-Claude Juncker, a anonciat ièr que quita publicament son cargue, qu’a tengut pendent sèt ans, en reconeissent que los dreches dels trabalhadors son estats mancats. Juncker a criticat l’austeritat budgetària impausada e a plangut que la tragèdia del caumatge siá un lèst. “Nos avián promés que la moneda unica aviá portat, coma un avantatge, un ajustament positiu als afars socials, mas al contrari a aumentat lo caumatge”.
 
Après plànher aquela situacion, Juncker a dich que li auriá agradat que s’establiguèsse un sistèma de compensacion pels estats que fan las reduccions budgetàrias, exigidas per Brussèlas, per redusir lo deficit. “Los païses del nòrd son pas mai vertuoses que los del sud. Soi totalament contra aquela distincion. A aqueles del nòrd que creson que son fòrça mai vertuoses que los del sud, lor caldriá agachar las chifras dels darrièrs ans e veirián qu’eles èran pas tan vertuoses coma cresián”.
 
Juncker a demandat tanben que i aja “mai de mesuras de solidaritat sociala” tre ara, e a prepausat un salari minim europèu. “Es una mesura essenciala, perque autrament, se perdrà lo sosten de la classa trabalhadora en Euròpa. La dimension sociala de l’Union Europèa es lo filh bòrd de l’union economica e monetària, mas se deu manténer e ne cal parlar en tèrmes concrets e non pas abstraches”, çò a apondut.
 
Dins aquel sens, a dich que cal far pagar las consequéncias de la crisi als “mai fòrts”. “Tombi pas dins un esquerrisme estupid, disi pas que los milionaris son los que devon pagar, mas accèpti pas que los milionaris paguen pas”.
 
Juncker quitarà lo cargue aqueste genièr. Lo 21 de genièr, s’elegirà previsiblament lo neerlandés Jeroen Dijsselbloen coma nòu president de l’Eurogrop. Juncker li a recomandat d’escotar los païses del sud.