L’umanitat a ja consumat totas las ressorsas naturalas que la Tèrra pòt produire en un an. Lo 22 d’agost passat, la planeta intrèt en deficit ecologic, çò anoncièt Global Footprint Network (GFN) —qu’estúdia las ressorsas mondialas que se consuman e cossí se gerisson— en tot avertir que, dempuèi aquel jorn, l’umanitat viu “a crèdit de la planeta e de las generacions futuras, en subresplechant las ressorsas naturalas e en amolonant de carbòni dins l’atmosfèra”.
 
Aquela data se nomena Jorn del Despassament. L’an passat se fixèt al 29 de julhet mas ongan es arribada al 22 d’agost. S’agís de la reduccion pus granda dels darrièrs 50 ans. Aquela reduccion s’atribuís als efièches del confinament deguts a la pandemia de la covid-19.
 
 
“Mòu la data”
 
De tot biais, lo Jorn del Despassament data s’es rebatut suls rets socials amb l’etiqueta #MoveTheDate, “mòu la data”. GFN òbra per que se faga d’esfòrces per consumar mens de ressorsas e aital diferir aquel jorn. Se capitam a retardar aquela data de cinc jorns cada annada, en 2050 poiriam viure tornarmai amb la capacitat normala de la planeta.
 
 
Consumam mai de ressorsas que las que pòt produire la planeta
 
L’òme consuma fòrça mai de ressorsas que las que pòt produire la planeta. Segon los calculs del GFN, per cobrir la demanda de ressorsas del consum uman, caldriá una planeta e mièja, e se contunham de manténer aquel nivèl, a la mitat de sègle caldrà ja doas planetas. Mathis Wackernagel, fondador del GFN, explica qu’aqueles darrièrs cinquanta ans lo deficit ecologic a crescut d’una manièra exponenciala, e que n’i a pas mai pro amb una planeta per satisfar tot lo consum e absorbir tot lo curum.
 
“La degradacion de l’environament mena inevitablament a una diminucion de las tèrras productivas; aital nòstre deute aumenta e condemnam las generacions futuras”, çò avertís lo GFN. Segon lors donadas, la causa màger del deficit son las emissions de CO₂, qu’equivalon al 55% de l’impacte environamental; lo rèsta ven de l’esplecha de las ressorsas naturalas.