Los Dragons Catalans se devon desplaçar dissabte a Warrington per jogar contra Wigan. Aprèp, deurián seguir 5 partidas de Superliga a Perpinhan. Mas… entre los angleses qu’an pas enveja de venir sul continent e la prefectura que tarda de balhar l’autorizacion de lor venguda, los dirigents sang e aur son a crentar de dever jogar maitas partidas en Anglatèrra e d’aver cap de recèpta a Brutus ont espèran de reçaupre 7000 espectators a cada partida.

Un torn de Copa de passat
 
Amb l’arrèst de las formacions del Championship e de League One, lo format de la Cup cambièt. Lo sòrt tombèt suls Dragons que devián jogar una partida de barratge per poder afrontar Salford en quart.
 
Sus la pelena d’Huddersfield, tornèron trapar dissabte los jogaires de Wakefield qu’avián estrilhat 58-0 la setmana passada.
 
Jos una brava pluèja, los angleses prepausèron una melhora oposicion, mas los mièges Maloney e Drinkwater saupèron mestrejar la partida, en particular amb lo jòc al pè. A la pausa, los catalans menavan 20-6 e encara!, los arbitres de tòca generoses avián validat la transformacion anglesa qu’èra passada fòra dels pals!
 
Los Dragons portèron lor avantatge a 36-12, puèi encaissèron dos ensages dins las darrièras minutas (36-24) que cambiavan pas res al sòrt de la partida, mas que faguèron romegar l’entraïnaire McNamara!
 
 
La crida al pòble
 
Dijòus, los dirigents catalans lancèron una crida a totes los sostens del club per obténer una ajuda financièra (amb dons deductibles per las talhas).
 
Lo budgècte previsional aviá pas previst totes aqueles desplaçaments en avion privat cap al Nòrd. De mai, una participacion financièra seriá un argument per butar la cadena L’Équipe a assegurar la retransmission en dirècte de qualques partidas jogadas a Perpinhan.
 
Cèrtas disciplinas vendon plan car lo dreit de retransmission de lors espròvas. Pel XIII en çò nòstre, es lo contrari: cal metre la man a la pòcha!
 
 
NRL: las urpas ponchudas de las Pantèras
 
En cap del classament de l’NRL, Penrith ten ara 3 punts d’avança suls seguents.
 
Mai collectiva, mai imaginativa, amb un sosten permanent al portaire de la palma, la formacion de las Pantèras estofèt las Làmias (38-12) e signèron lor desena victòria en seguida. Lo segond, Melbourne, amb una formacion rejovenida en rason de las nafraduras, se fa batre per Parramatta (14-0) que los raganta al classament.
 
Mercé a la victòria cò dels Tigres (38-16), los Polets demòran plan plaçats per finir en quatrena posicion, una plaça que balha un dreit a l’error dins las fasas finalas. Mas, amb 20 punts al classament, an solament un avantatge a la diferéncia dels punts sus Canberra e demòran jos la menaça de Newcastle (19 punts) e dels Lapinons (18 punts).
 
 
I a encara de brave mond
 
Vos faguèri part fa doas setmanas de l’arrancatge de pegasolets tretzistas de sus la veitura. Vaquí qu’un legeire nos a mandat (d’un biais anonim) un pegasolet de Carcassona XIII e un dels Dragons. Tant que i aurà de tretzistas, i aurà de bravas gents sus aquesta planeta!
 
 
 
Alan Roch