La societat farmaceutica chinesa Sinovac Biotech anoncièt dimenge passat que lo vaccin qu'èran a desvolopar generava d’anticòrses en mai del 97% de las personas. Segon una entrevista de son director general, Weidong Yin, que se retransmetèt suls canals internacionals de la television estatala chinesa, an testat lo vaccin sus mai d’un milièr de volontaris e mens del 5% an patit d’efièches segondaris leugièrs coma la lassièra.
 
Lo resultat del tèst es positiu se prenèm en compte qu’entre lo 97% e lo 98% dels vaccinats an desvolopat d’anticòrses contra lo nòu coronavirus. “Ara especulam que lo temps de proteccion del vaccin pòt èsser de dos ans o quitament mai, mas aquò o caldrà demostrar amb las donadas de la recèrca”, çò apondèt.
 
Lo vaccin de Sinovac Biotech es ara a sa tresena fasa e s’administra a de volontaris de Brasil e de Bangladèsh, dos païses ont la malautiá s’es plan espandida.
 
A la diferéncia del vaccin rus, l’ÒMS a classat aquel vaccin a la segonda posicion dels mai avançats, solament darrièr lo que se desvolopa a l’Universitat d’Oxford. Dins aquela la lista de l’ÒMS se tròban d’autres quatre vaccins que se desvolopan en China.