capçalera campanha

Actualitats

InternacionalPoliticaSocietat

Kenosha: de civils armats fusilhan los manifestants antiracistas

Almens dos manifestants tuats del temps que Jacob Blake se tròba en un estat fòrça grèu e poiriá demorar paralisat

La violéncia racista als Estats Units es a passar l’òsca. A Kenosha (Wisconsin), de civils armats an fusilhat de manifestants antiracistas. Per ara, lo bilanç es de dos mòrts.
 
Dimècres passat, dins la quatrena nuèch de protèstas a Kenosha e endacòm mai pel darrièr cas de violéncia policièra contra un òme negre, los manifestants respectèron pas lo cobrifuòc e foguèron reprimits per la polícia que lor bandiguèt de gases lacrimogèns del temps que los manifestants i respondián en lançant de botelhas e de petards. Puèi, mentre la situacion èra tornada a la calma, un òme amb un fusilh tombèt pel sòl e comencèt de tirar suls manifestants. Ne tuèt almens dos.
 
Qualques manifestants capitèron a filmar l’accion e la publiquèron suls rets socials. E mai los publiquem aicí, cal avertir que son d’imatges durs e chocants.

En seguida, las carrièras venguèron un infèrn. Maitas personas armadas se son passejadas amb impunitat per las carrièras de Kenosha en tirant suls manifestants.
 
A comptar d’aquel moment, la nuèch a Kenosha s’es tresmudada en una scèna d'orror.


Jacob Blake poiriá demorar paralisat
 
Las protèstas comencèron en seguida del darrièr cas de violéncia policièra racista aquí, a Kenosha. De policièrs fusilhèron dins l’esquina Jacob Blake, un òme de 29 qu’es ara espitalizat en un estat grèu. Mentre que Blake èra a mand de dobrir la pòrta e d’intrar dins sa veitura, ont i aviá sos tres enfants, un dels agents l’arrapèt per la camiseta del temps qu’el e d’autres agents lo fusilhèron dins l’esquina fins a sèt còps.
 
Blake poiriá demorar paralisat. Per ara, li an degut extirpar una part dels intestins e li son nafrats seriosament los rens, lo fètge e l’estomac.

 
 

 
 
 
 

abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Franc Bardòu
1.

A comptar d’aquel moment, la nuèit a Kenosha s’es tresmudada en una scèna d'orror. Los antiracistas agèssen agut d'armas eles tanben, se seriá tresmudada en une scèna de guèrra civila. Non ne devèm èsser gaire luènh, a l'ora d'ara. E l'òrdre que risca de ne seguir per amorçar la flama risca fòrça dèsser ultra-autoritarista. Una epòca formidabla…

  • 8
  • 0

Escriu un comentari sus aqueste article