Las protèstas contra la violéncia policièra racista als Estats Units son arribadas a l’NBA, la celèbra liga de basquetbòl e una de las competicions esportivas mai importantas del Mond. Dijòus, se deviá jogar la cinquena partida del primièr torn dels play-off, ont s’afrontavan los Milwaukee Bucks —la melhora esquipa de la sason— e los Orlando Magic, mas los jogadors dels Bucks sortiguèron pas sul terren.  D’efièch, protestavan contra lo fach que de policièrs fusilhèron dins l’esquina lo negre Jacob Blake mentre qu’anava dobrir la pòrta e intrar dins sa veitura, ont èran sos tres enfants. Los jogadors legiguèron un comunicat en explicant lor decision dins un vidèo ont portavan de camisetas amb lo lèma “Black lives matter”.
 
La decision de l’esquipa Milwaukee Bucks es istorica, perque los jogadors de l’NBA an pas de drech de cauma reconegut, e per tant pòdon èsser sancionats.
 
En seguida, an jonch la cauma las esquipas Oklahoma City Thunder, Houston Rockets, Los Angeles Lakers e Portland Trail Blazers, que devián jogar puèi mas qu’an tanben refusat de jogar. Per ansin, l’NBA deguèt suspendre totas las partidas de la jornada en anonciant que se jogarián a un autre moment.
 
La protèsta es anada delà l’NBA: l’NBA femenina e las ligas de beisbòl, de fotbòl e de tènis son suspendudas.
 
Un dels jogadors mai coneguts, LeBron James dels Los Angeles Lakers publiquèt un messatge sus Twitter fòrça expressiu: “A cagar a la vinha! Demandam de cambiaments. N’ai mon confle”.




    

fffff		fffff
	Comunicat dels jogadors de Miwaukee Bucks   «Dins los darrièrs quatre meses sèm estats testimònis de fòrça injustícias envèrs la comunautat afroamericana. De ciutadans de tot lo país an emplegat lors voses e de plataformas per denonciar aqueles crimes. Aquestes darrièrs jorns, dins l’estat de Wisconsin avèm vist l’òrre vidèo d’un policièr que fusilha Jacob Blake dins l’esquina fins a sèt còps, e tanben que se tira sus de manifestants. Malgrat l’energica demanda de cambiament, i a pas agut cap d’accion, e per tant uèi nos podèm pas centrar sul basquetbòl.   Quand sortissèm sul terren e representam Milwaukee e Wisconsin, s’espèra que joguem a un naut nivèl, que fagam los esfòrces mai grands e que siam responsables. Mantenèm aquela exigéncia e demandam la meteissa causa als legislators e als còrses de polícia. Volèm la justícia per Jacob Blake e demandam que s’establisca las responsabilitats dels agents. Es, per tant, indispensable que lo parlament de Wisconsin se torne reünir après de meses d’inaccion e que prenga de mesuras significativas sus las responsabilitats de la polícia, sus aquela brutalitat, e qu’entamene una reforma de la justícia penala. Empenhèm totòm a s’assabentar, a protestar pacificament e a oblidar pas de votar lo 3 de novembre.