La cronica esportiva vira un pauc tròp a la cronica medicala. Aprèp Hull FC, vaquí los Dragons Catalans pertocats per la pandemia: tres jogaires e un membre de l’enquadrament positius. Aquò vòl dire confinhament dels jogaires; represa autorizada de l’entraïnament lo 8 de setembre; doas partidas de mai reportadas dins un calendièr que se poirà pas estirar: lo rescontre contra Leeds se tendrà pas lo 7 de setembre a Brutus. Tant qu’a i èsser, los Dragons espèran la responsa del Ministèri (que la prefectura dels Pirenèus Orientals ditz que pòt pas prene la decision) per una derogacion per las formacions anglesas que devon venir a Perpinhan: pas question de las metre en quarantena!

Lo rinocèros es feròç
 
Fauta de Catalans, Wigan s’es degut emplegar per batre Castleford 30-22. Los Rinoceròsses de Leeds trepejan los Diables Roges de Salford: 50-12. St Helens es mai fòrt qu’Hull-KR: 32-18.
 
Remés de l’arrèst covid, Hull FC domina Huddersfield 31-12. Sus sa pelena, ont se tenián las 5 partidas de la dimenjada, Warrington enfonza Wakefield: 36-0.
 
 
NRL: encara quatre jornadas per la primièra fasa
 
Las 4 jornadas de la fasa de classament deurián pas cambiar lo nom dels 8 qualificats per las pelhòfas. Sols, los Warriors neozelandeses pòdon encara esperar montar dins lo bon vagon, mas tenon 4 punts de retard sul ueiten, las Làmias de Cronulla, e una diferéncia punts marcats/punts encaissats catastrofica: — 101.
 
Las Pantèras de Penrith subisson la dominacion dels Tigres pendent una mièja orada abans de prene lo contraròtle de la partida: 30-6.
 
Meteissa marca per Melbourne contra Manly. Los Lapinons dominan Paramatta: 38-0 alara que los Polets son sens pietat per Brisbane completament desmobilizat: 58-12.
 
Los neozelandeses son en forma (36-6 contra Newcastle), mas serà benlèu tròp tard.
 
En cap d’aficha de la 17a jornada, poirem seguir l’oposicion Lapinons-Melbourne divendres.
 
 
125 ans!
 
E nos desiram un bon anniversari! Es pas cada jorn que se pòt festejar sos 125 ans. Aquò èra lo 29 d’agost de 1895 al George Hotel d’Huddersfield ont 21 clubs decidiguèron de quitar la Rugby Football Union per faire espelir la Northern Rugby Football Union que prendriá lo nom de Rugby Football League en 1922. Sul luòc d’aquesta naissença, en aquesta fin d’agost, s’onorèt la memòria del secretari fondador de la federacion novèla. S’apelava Joseph Platt. Un nom de gravar dins un canton de nòstra memòria quand seguissèm una partida de 13!

 
 

Alan Roch