capçalera campanha

Actualitats

EscòlaInternacionalLengaPolitica

Mongolia del Sud: de protèstas contra lo remplaçament del mongòl pel chinés a l’escòla

Pequin vòl introduire lo chinés mandarin en retirant gradualament lo mongòl de las classas e en acantonant la matèria de mongòl coma lenga estrangièra

| @Gildchopsticks
De milièrs de personas protèstan en Mongolia del Sud contra los plans de Pequin de remplaçar la lenga mongòla pel chinés mandarin dins las escòlas, çò rapòrta The Guardian. Dimars, i aguèt lo primier jorn de classa e los mongòls de l’estat chinés constatèron la mesa en plaça de politicas lingüicidas anonciadas en junh: lo plan d’introduire lo chinés mandarin en levant progressivament lo mongòl de las classas. Ongan son tres las matèrias afectadas. Pequin assegura, totun, que se mantendrà los corses de lenga mongòla e de lenga coreana.
 
Aquò a provocat de seriosas protèstas dels mongòls que veson que l’ensenhament de lor lenga dins las escòlas ven lo d’una lenga estrangièra. Força parents d’escolans an menaçat de gardar lors filhs a l’ostal.
 
Segon Enghebatu Togochog, director del Centre d’Informacion dels Dreches Umans de la Mongolia Meridionala, que son sèti es als Estats Units, la region patís dempuèi qualques decennis de politicas de genocidi cultural. Dins aquel sens, assegura que lo mond creson pas al discors oficial que los cambiaments lingüistics son a lor avantatge. Togochog a tanben raportat que las protèstas se son reprimidas amb fòrça violéncia.
 
Las protèstas son sostengudas per Elbegdorj Tsakhia, president de l’estat de Mongolia de 2009 al 2017. “Ont que viscas, tant que sès mongòl te cal jónher aquel movement. Sens la lenga mongòla, podèm pas parlar de cap de nacion mongòla”.
 
De soslinhar que las autoritats chinesas barrèron tanben, la setmana passada, la sola aplicacion mongòla de rets socials dins lo país.
 
 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palma
4.

Què vulgan posar a l'escola tamben lo mandarinet, es al cap e a la fin normal, sustituir la lenga mongola per las mandarinas, aissò ja o veirem quan passe?

  • 0
  • 3
Franc Bardòu
3.

Los defensors dels dreits umans s'indignan ? I a plan de qué. Mas unes dreits umans senses mejans legals ni coercitius per se far respectar pertot non son que pregàrias a la glèisa del vilatge… Als reialames borbons d'Espanha e de França, ne sabèm plan quicòm ja !

  • 11
  • 4
Franc Bardòu
2.

Òm se creiriá al Tibet !

  • 8
  • 0
Pitaluga
1.

Lo ministre de l'Educacion chinés de sona Yang-Mi-Shèl Baln -Kê çò sembla.

  • 6
  • 0

Escriu un comentari sus aqueste article