Un an de mai, l’independentisme catalan alestís la fèsta nacionala de Catalonha, la nomenada Diada, que se tendrà divendres venent, 11 de setembre. Ça que la, ongan serà una jornada atipica a causa de las mesuras contra la covid-19. Per tant, se farà pas de manifestacion gigantassa mas una tièra de mobilizacions que combinaràn de protèstas fisicas e d’eveniments virtuals. L’eveniment l’organiza l’Assemblada Nacionala Catalana (ANC) e Òmnium Cultural e se tendrà jos lo lèma “Lo dever de bastir un avenir melhor, lo drech d’èsser independents”. La tòca es de demostrar que “l’independéncia non solament es possibla mas mai necessària que jamai”.
 
 
Ont seràn los recampaments?
 
Amb aquelas mobilizacions, l’ANC vòl denonciar la discriminacion economica e sociala que la patís Catalonha e que pòrta tòrt als ciutadans, en mai de revendicar l’independéncia coma lo sol mejan de revirar aquela situacion. I aurà 107 ponches d’acamp amb una capacitat totala de 48 000 personas dins 82 comunas del Principat. Es previst que se crèe mai de ponches d’amassada a causa del nombre de participants. La majoritat de las protèstas se tendràn davant los sètis administratius de l’estat espanhòl: Agéncia Tributària (tresaur public), Banca d’Espanha, Seguretat Sociala, oficis espanhòls de l’emplec, estacions ferroviàrias etc.
 


Totas las mobilizacions seràn estaticas e los manifestants deuràn manténer a tot moment dos mètres de distància amb la rèsta del public. Se seguirà lo modèl de manifestacions que s’es vist en d’autres endreches del Mond ont se garentís una distància constanta e s’empacha los atropaments.
 
Se demanda que lo mond que participaràn a aqueles recampaments s’inscrigan per ne poder contrarotlar la quantitat de personas. A mai, sus plaça, i aurà de volontaris que velharàn per que se despasse pas lo nombre previst de participants. Caldrà portar la masca.
 
Del costat virtual, se ven d’activar lo sit web Xarxa Independència (Ret Independéncia) amb la tòca de crear un grand malhum virtual que mòstre l’implantacion de l’independentisme dins lo país e illustre la capacitat collectiva de las gents per far de grands cambiaments. En realitat, es una iniciativa solidària qu’amassa d’argent per ajudar los domenis social, cultural e sanitari que passan un marrit moment economic a causa de la pandemia.
 
 
De ser, manifestacion a Barcelona
 
Delà tot aquò, los Comitats de Defensa de la Republica (CDR) an cridat a manifestar a 19h30 a Barcelona per denónciar la justícia espanhòla e exigir quitament del govèrn de la Generalitat qu’arrèste la repression de la polícia catalana, los Mòssis d’Esquadra, e que torne al camin de la desobesissença a l’estat.