Los Païses Basses an suspendut temporàriament las extradicions devèrs Polonha perque dobtan de l’independéncia del poder judiciari. Dins un comunicat, lo tribunal neerlandés encargat d’avalorar los mandats d’arrèst europèus a anonciat que desenant acceptarà pas pus las demandas dels tribunals poloneses, fins que la Cort de Justícia de l’Union Europèa se pronóncie sus la manca d’independéncia judiciària que l’a tanben criticada la Comission Europèa. Lo meteis tribunal neerlandés interpelèt la Cort Europèa en julhet sus aquela question e ara a decidit d’arrestar totes los procèsses entrò que Luxemborg se pronóncie.
 
Lo partit conservator que govèrna en Polonha, Drech e Justícia, faguèt en 2017 una reforma polemica del sistèma judiciari, ont l’executiu a mai de contraròtle sus la Cort Suprèma e lo sistèma de nominacion dels jutges. La Comission Europèa alertèt que la reforma èra una menaça pels principis democratics e per l’estat de drech. La Comission aviá avisat Polonha dins los darrièrs meses per que renoncièsse a la reforma, mas lo govèrn de Morawiecki ne faguèt pas cas.