Bon, per ara, tot se met en plaça per que los Dragons tornen trapar la pelena de Brutus aqueste dissabte 12 de setembre a 6 oras del vèspre, amb un public limitat a 5000 espectators. Serà lo campion Wigan que vendrà afrontar los catalans. Serà la primièra partida de Superliga que tornarà trapar d’espectators, vist qu’en Anglatèrra caldrà esperar la debuta d’octòbre per veire se dobrir la pòrta dels estadis.
SuperLiga: volètz de punts? Aquí n’avètz!
Quatre partidas èran al programa d’aquesta fin de setmana. Los prepausats al planchòt agèron plan de trabalh.
Divendres, Castleford e Salford se tirèron la borra e los Tigres ganhèron: 37-30. Suspresa bèla: la desfaita del cap de fila Wigan fàcia a Hull KR: 34-18.
Dissabte, Saint Helens a pas cap de pietat pels Gigants d’Huddersfield: 54-6 e Warrington ten Hull FC a bona distància: 37-12.
NRL: SBW sus la punta dels pès
L’eveniment de la jornada deviá èsser lo retorn de Sonny Bill Williams en NRL. Mas a 35 ans, aprèp qualques partidas amb Toronto, un temps de confinhament en Anglatèrra, un autre a l’arribada en Austràlia, li èra complicat d’èsser a la nautor dels jogaires dins lo ritme de la competicion. Trent Robinson lo faguèt dintrar per 13 minutas, agèt 5 balons, faguèt una liberacion e sortiguèt… en bufant. Aquò empachèt pas los Polets de ganhar a Canberra aqueste revenge de la finala 2019: 18-6.
Kalyn Ponga signa tres ensages e Newcastle bat las Làmias de Cronulla: 38-10.
Los jogaires de Brisbane plan valents pòdon pas res contra lo primadièr Penrith: 12-25. Melbourne s’impausa cò dels Lapinons: 22-16.
Los Combatents neozelandeses se baton plan, mas pòdon pas empachar Parramatta de ganhar: 24-18, e de veire s’envolar los espèrs de qualificacion. Una partida va fins al punt en aur e, mercé a un tombat, los Vaquièrs baton Sant Jòrdi 23-22.
Elèit: represa dels entraïnaments
Una puèi l’autra, las esquipas occitanas e catalanas d’elèit tornan prene lo camin dels entraïnaments collectius per una debuta de sason fixada als 17 e 18 d’octòbre per l’Elèit 2 e doas setmanas mai tard per l’Elèit 1.
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Se volet anar a Brutús :
http://www.catalansdragons.com/articles-45/208-7977-le-guide-du-supporter/
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari