capçalera campanha

Actualitats

InternacionalPoliticaSocietat

Lèsbos: un incendi a avalit lo principal camp de refugiats d’Euròpa

Mòria èra un camp pensat per aculhir tres mila personas, mas a fins ièr n’i aviá 13 000. Maitas organizacions umanitàrias denóncian dempuèi d’annadas sas condicions insalubras

| Reuters
Un incendi a destruch una bona part del camp de refugiats de Mòria, dins l’illa grèga de Lèsbos, ont subrevivon (o subrevivián fins ara) mai de 13 000 personas, e mai l’espaci ne pòsca sonque aculhir 3000. Las autoritats grègas an pas raportat de mòrts ni de nafrats. Divèrsas organizacions umanitàrias denóncian dempuèi d’annadas las condicions insalubras de Mòria, ont fa gaire s’es detectat un brot de covid-19 amb gaireben un centenat d’infeccions.
 
L’incendi comencèt de cremar dins la nuèch de dimars a dimècres, e devèrs mièjanuèch se seriá evacuat qualques refugiats devèrs l’estrada que connècta lo camp amb la vila de Mitilena, segon divèrses testimònis. 25 pompièrs an trabalhat a l’extincion del fuòc.
 
“Avèm vist lo fuòc a s’estendre sus Mòria amb colèra pendent tota la nuèch. Tota l’encencha es estada engolida per las flamas; avèm vist de gents desorientadas a fugir las flamas, d’enfants espaventats e de parents en estat de chòc. Trabalham per respondre a lors besonhs”, çò a dich Marco Sandrone, responsable de Mètges sens Frontièras del camp.
 
Segon los primièrs resultats de l’enquista, lo fuòc auriá començat dins mai d’un ponch del sit a l’encòp. De soslinhar que lo nuclèu de Mòria es un ancian centre de detencion, mas la majoritat dels refugiats demoravan dins las olivedas de l’entorn, ont èran installadas de milièrs de tendas. Lo sit es ara completament avalit, segon çò que lo ministre de l’immigracion, Manos Logothetis, a declarat a l’agéncia Athenas News .
 
Ièr, dimècres, lo primièr ministre grèc, Kiriakos Mitsotakis, convoquèt una reünion d’urgéncia del conselh dels ministres per parlar de l’afar. De son latz, Brussèlas finançarà lo transpòrt en Grècia continentala dels 400 menors non acompanhats qu’èran aquí, segon çò qu’anoncièt l’eurocomissària de l’Interior, Ylva Johansson. La Comission Europèa es en contacte amb las autoritats grègas per l’incendi e defend que se prioriza sustot la seguretat e l’asili de totes los refugiats del camp.
 
Mòria èra un camp pensat per aculhir tres mila personas, mas fins a ièr n’i aviá 13 000. Comptava solament tres mètges. D’efièch, quand la drecha arribèt al poder en Grècia, l’estiu passat de 2019, lo govèrn retirèt la seguretat sociala als refugiats en daissant los enfants sens vaccins e los malauts cronics sens tractaments.
 
 
 

abonar los amics de Jornalet

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article