Lo president de Bielorussia, Aleksandr Lukashenko, s’arrapa al poder e refusa de demissionar malgrat las protèstas. Lukashenko a dich a Moscòu que se tomba, Russia tombarà “en seguida”. Dins una entrevista publicada per qualques mèdias russes, Lukashenko reconeis que fa tròp de temps qu’es president mas que refusa de partir. Se se n’anava, i auriá “un masèl” de sos partisans, çò a dich. “Se Lukashenko tomba, tombarà tot lo sistèma, puèi tota Bielorussia”, çò assegura en tot afirmar que per el “es impossible” d’arrestar las protestas organizadas suls rets socials. Es la primièra entrevista de Lukashenko que se publica dempuèi que comencèron las protèstas.
 
“Tot aquò es mondializat e internacionalizat. Se cresètz que la granda Russia o poirà gerir, vos enganatz”, çò considèra Lukashenko. A mai, ditz qu’a parlat amb Putin, “son grand fraire” per lo n’avertir. Tanben a dich dins l’entrevista que se’n pòt pas anar, perque “i a tròp de causas en jòc”. “Me cal defendre çò qu’avèm creat amb nòstras mans, me cal protegir las gents que nos ajudèt a o crear, la majoritat que votèt per ieu”, çò ditz.
 
En mai d’aquò, afortís que las enòrmas manifestacions que se debanan per carrièras —qu’a reprimidas amb fòrça duretat e de centenats de detencions— son noiridas per l’exterior. “Cossí combates aqueles canals de Telegram? Cossí los blòcas? Degun o pòt pas far, pas quitament los qu’inventèron Internet, los americans”, çò ditz.
 
Se prevei qu’ane a Moscòu lèu-lèu per rescontrar lo president rus, Vladimir Putin.