La societat farmaceutica AstraZeneca e l’Universitat d’Oxford an decidit d’interrompre temporàriament los ensages clinics del vaccin contra la covid-19 perque un dels participants a agantat “una malautiá potencialament inexplicabla”. S’agís d’una inflamacion de la mesolha, çò a explicat lo pòrtavotz de la societat estatsunidenca.
 
“Es una accion de rotina que se passa cada còp que i a una malautiá potencialament inexplicabla pendent un ensag mentre qu’aquò s’examina”, çò a apondut lo pòrtavotz. Ara un comitat independent es a avalorar la situacion per determinar se l’ensag pòt contunhar.
 
Lo vaccin desvolopat per AstraZeneca e l’Universitat d’Oxford aviá donat fins ara de resultats positius en fasas inicialas e s’esperava que seriá disponible dins la primièra mitat de l’an 2021. Los tèstes se fan a l’ora d’ara al Reialme Unit, als Estats Units, en Brasil e Sud-Africa.
 
Aquel vaccin es lo que l’Union Europèa a decidit de crompar d’un biais centralizat per lo distribuir als estats membres.